សមាគមអតីតយុទ្ធជន និងនិវត្តជនកម្ពុជា បើកវេទិកាកិច្ចសហប្រតិបត្តិការធុរកិច្ច កម្ពុជា-ចិន លើកដំបូង ដើម្បីទាក់ទាញការវិនិយោគ និងលើកកម្ពស់ជីវភាពអតីតយុទ្ធជន

សមាគមអតីតយុទ្ធជន និងនិវត្តជនកម្ពុជា បានរៀបចំ «វេទិកាកិច្ចសហប្រតិបត្តិការធុរកិច្ច កម្ពុជា-ចិន» លើកដំបូង ក្រោមប្រធានបទ «កម្ពុជាស្វាគមន៍ការវិនិយោគពីប្រទេសចិន ដើម្បីអនាគតរួមគ្នាព្រមទាំងអតីតយុទ្ធជន និងនិវត្តជន» ។ វេទិកាធុរកិច្ចនេះប្រព្រឹត្តទៅក្រោមអធិបតីភាព ឯកឧត្តម អ្នកឧកញ៉ា ម៉ម វណ្ណឌី ទីប្រឹក្សាសម្ដេចតេជោ ហ៊ុន សែន ប្រធានព្រឹទ្ធសភា និងជាអនុប្រធានសមាគមអតីតយុទ្ធជន និងនិវត្តន៍ជនកម្ពុជា តំណាងដ៏ខ្ពង់ខ្ពស់ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគម ដោយមានការអញ្ជើញចូលរួមពី លោក ឈី ហ្វាង (Qi Fang) សមាជិកក្រុមប្រឹក្សានៃសមាគមស្ថាប័ន ជីហ្វា (GIFA) និងជាប្រធានគណៈប្រតិភូអ្នកវិនិយោគចិន និងគណៈប្រតិភូធុរជន និងវិនិយោគិនមកពីខេត្តក្វាងស៊ី សាធារណរដ្ឋប្រជាមានិតចិន ចំនួន ៦០ ក្រុមហ៊ុន ព្រមទាំងថ្នាក់ដឹកនាំសមាគមអតីតយុទ្ធជន និងនិវត្តជនកម្ពុជា តំណាងក្រសួង-ស្ថាប័ន ពាក់ព័ន្ធ និងពាណិជ្ជករកម្ពុជាជាច្រើនរូប ដើម្បីឈ្វេងយល់ពីឱកាសវិនិយោគ និងពង្រឹងកិច្ចសហប្រតិបត្តិការសេដ្ឋកិច្ចរវាងកម្ពុជា ចិន និងក្នុងគោលបំណងរួមចំណែកលើកកម្ពស់ជីវភាពអតីតយុទ្ធជន និងនិវត្តជននៅកម្ពុជា។ វេទិកាធុរកិច្ចនេះបានរៀបចំឡើងនាព្រឹកថ្ងៃពុធ ទី២២ ខែកក្កដា ឆ្នាំ២០២៦ នេះ នៅសណ្ឋាគារ FairField by Marriot រាជធានីភ្នំពេញ។ 

ឯកឧត្តម អ្នកឧកញ៉ា ម៉ម វណ្ណឌី អនុប្រធានសមាគមទទួលបន្ទុកធុរកិច្ច​ និងវិនិយោគ បានមានប្រសាសន៍ស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាលជ្រៅចំពោះគណៈប្រតិភូវិនិយោគិនចិនដែលដឹកនាំដោយ លោក ឈី ហ្វាង (Qi Fang) សមាជិកក្រុមប្រឹក្សានៃសមាគមជីហ្វា (GIFA) ព្រមទាំងតំណាងក្រុមហ៊ុនចិនទាំង​៦០​ក្រុមហ៊ុន ព្រមទាំងម្ចាស់ក្រុមហ៊ុនក្នុងស្រុក និងតំណាងក្រសួង-ស្ថាប័នពាក់ព័ន្ធរបស់កម្ពុជាទាំងអស់ដែលបានចូលរួមវេទិកាកិច្ចធុរកិច្ចដ៏មានសារៈសំខាន់នេះ។ ជាមួយគ្នានេះញដែរឯកឧត្តម អ្នកឧកញ៉ា ក៏បានថ្លែងអំណរគុណចំពោះ ឯកឧត្តម គីម សុផារុន អគ្គលេខាធិការរង និងជាអនុប្រធានក្រុមការងារធុរកិច្ច​ និងវិនិយោគ របស់សមាគមអតីតយុទ្ធជន និងនិវត្តជនកម្ពុជា និងលោក តាំង សុខងន់ អគ្គកុងស៊ុលកម្ពុជាប្រចាំទីក្រុងណាននីង ដែលបានខិតខំសម្របសម្រួលឱ្យព្រឹត្តិការណ៍នេះលេចរូបរាងឡើងក្នុងថ្ងៃនេះ។

ឯកឧត្តម អ្នកឧកញ៉ា ម៉ម វណ្ណឌី  បញ្ជាក់ថា «វេទិកាកិច្ចសហប្រតិបត្តិការធុរកិច្ច កម្ពុជា-ចិន» នេះគឺជាព្រឹត្តិការណ៍សហប្រតិបត្តិការធុរកិច្ចលើកដំបូងដែលសមាគមអតីតយុទ្ធជន និងនិវត្តជនកម្ពុជាបានរៀបចំឡើងក្នុងគោលបំណងធំៗចំនួន៤​រួមមាន៖ ១.ឈ្វេងយល់ពីតួនាទីរបស់សមាគម ២.ឈ្វេងយល់ពីបរិយាកាសវិនិយោគ ៣.ឈ្វេងយល់ពីឱកាស និងសក្តានុពលនៃការវិនិយោគ ៤.បង្កើតកិច្ចសហប្រតិបត្តិការជាក់ស្តែងដើម្បីផ្តល់ផលប្រយោជន៍ទៅវិញទៅមក ជាពិសេសគាំទ្រដល់អតីតយុទ្ធជន និងនិវត្តជន។

ឯកឧត្តម អ្នកឧកញ៉ា បានគូសបញ្ជាក់ថា សមាគមអតីតយុទ្ធជន និងនិវត្តជនកម្ពុជា ដែលមាន សម្តេចតេជោ ហ៊ុន សែន ជាប្រធាន និង សម្តេចធិបតី ហ៊ុន ម៉ាណែត ជាអនុប្រធានទី១ តែងតែយកចិត្តទុកដាក់ខ្ពស់ចំពោះសុខទុក្ខ និងជីវភាពរបស់អតីតយុទ្ធជន តាមរយៈការផ្តល់ប្រាក់សោធននិវត្តន៍ ការថែទាំសុខភាព ការផ្តល់ដីធ្លី និងផ្ទះសម្បែង ដោយ “មិនបោះបង់អតីតយុទ្ធជនណាម្នាក់ចោលឡើយ”។ ឯកឧត្តម​បានបន្ថែមថា វេទិកាធុរកិច្ចលើកទី១ នេះ គឺជាជំហានដ៏សំខាន់មួយក្នុងការបង្កើតកាលានុវត្តភាពវិនិយោគ ដើម្បីរួមចំណែកលើកកម្ពស់ជីវភាពរបស់អតីតយុទ្ធជន និងនិវត្តជនឱ្យកាន់តែប្រសើរឡើង។

លោក ឈី ហ្វាង (Qi Fang) ប្រធានប្រតិភូពាណិជ្ជករ និងជាសមាជិកក្រុមប្រឹក្សានៃសមាគមទំនាក់ទំនងមិត្តភាពអន្តរជាតិក្វាងស៊ី​ ថ្លែងថា «ការដែលរូបខ្ញុំ និងក្រុមសហគ្រិនចិន បានឈរនៅលើទឹកដីកម្ពុជានានៅពេលនេះ គឺមិនត្រឹមតែក្នុងនាមជាប្រធានប្រតិភូពាណិជ្ជករក្វាងស៊ីប៉ុណ្ណោះទេ ប៉ុន្តែគឺក្នុងនាមជាសមាជិកក្រុមប្រឹក្សានៃសមាគមទំនាក់ទំនងមិត្តភាពអន្តរជាតិក្វាងស៊ីផងដែរ។ សមាគមយើងតែងតែលើកកម្ពស់ទង់នៃសន្តិភាព ការអភិវឌ្ឍ និងកិច្ចសហប្រតិបត្តិការ​ ឈ្នះ-ឈ្នះ ដើម្បីជំរុញការផ្លាស់ប្តូរមិត្តភាព និងកិច្ចសហប្រតិបត្តិការរវាងប្រជាជន និងប្រជាជន។ តាមរយៈសកម្មភាពផ្លាស់ប្តូរមិត្តភាពលើគ្រប់វិស័យ និងគ្រប់កម្រិត យើងមានគោលបំណងបង្កើនការយល់ដឹង ជំរុញកិច្ចសហប្រតិបត្តិការពាណិជ្ជកម្ម និងការទំនាក់ទំនងរវាងតំបន់ក្វាងស៊ី និងបណ្តាប្រទេសនៅលើពិភពលោក ដើម្បីចូលរួមចំណែកយ៉ាងសកម្មក្នុងគំនិតផ្តួចផ្តើម “ខ្សែក្រវាត់ និងផ្លូវ” និងការកសាងសហគមន៍វាសនារួមសម្រាប់មនុស្សជាតិ»។

លោក ឈី ហ្វាង បញ្ជាក់ថា​ ការបន្តហូរចូលនៃវិនិយោគិនចិន គឺជាសញ្ញាវិជ្ជមានយ៉ាងច្បាស់ដែលបង្ហាញពីភាពទាក់ទាញរបស់កម្ពុជា ក្នុងនាមជាគោលដៅវិនិយោគដ៏សំខាន់មួយនៅក្នុងតំបន់។ រាជរដ្ឋាភិបាលកម្ពុជា បាននិងកំពុងបន្តខិតខំប្រឹងប្រែងកែលម្អបរិយាកាសធុរកិច្ច និងវិនិយោគ ដើម្បីទាក់ទាញវិនិយោគផ្ទាល់ពីបរទេសបន្ថែមទៀត ដែលនឹងរួមចំណែកដល់ការអភិវឌ្ឍសេដ្ឋកិច្ចជាតិ ការបង្កើតការងារ និងការផ្ទេរបច្ចេកវិទ្យា។ កម្ពុជានៅតែជាទីផ្សារដ៏មានសក្តានុពលសម្រាប់វិនិយោគិនបរទេស ជាពិសេសវិនិយោគិនចិន ដែលតែងតែមើលឃើញពីឱកាសរីកចម្រើននៅក្នុងប្រទេសកម្ពុជា។

គួរជម្រាបជូនថា ឆ្លងតាមកិច្ចពិភាក្សាក្នុង «វេទិកាកិច្ចសហប្រតិបត្តិការធុរកិច្ច កម្ពុជា-ចិន» នាព្រឹកនេះ អង្គវេទិកាទាំងអស់បានទទួលនូវព័ត៌មានសំខាន់ៗ អំពីបរិយាកាសវិនិយោគនៅកម្ពុជា បានឈ្វេងយល់ពីក្របខ័ណ្ឌច្បាប់ និងការលើកទឹកចិត្តក្នុងការវិនិយោគពីស្ថាប័នពាក់ព័ន្ធរួមមានក្រសួងពាណិជ្ជកម្ម ក្រសួងកសិកម្ម រុក្ខាប្រមាញ់ និងនេសាទ ព្រមទាំងក្រុមប្រឹក្សាអភិវឌ្ឍន៍កម្ពុជា (CDC) ។ ជាមួយគ្នានេះដែរ វិនិយោគិនកម្ពុជា ចិន ក៏បានចាប់ផ្តើមកំណត់វិស័យដែលមានសក្តានុពលជាក់ស្តែងសម្រាប់កិច្ចសហប្រតិបត្តិការ។

សមាគមអតីតយុទ្ធជន និងនិវត្តជនកម្ពុជា ត្រៀមខ្លួនធ្វើជាស្ពានចម្លងដ៏ជឿទុកចិត្ត រវាងវិនិយោគិនចិន និងភាគីពាក់ព័ន្ធនៅកម្ពុជា ដោយផ្តោត និងគាំទ្រតែលើធុរកិច្ចដែលស្របច្បាប់។ ការងារបេសកកម្មចម្បងរបស់សមាគមអតីតយុទ្ធជន និងនិវត្តជនកម្ពុជា ស្វែងរកការវិនិយោគមិនមែនសម្រាប់តែផលប្រយោជន៍ពាណិជ្ជកម្មសុទ្ធសាធនោះទេ ប៉ុន្តែជាបេសកកម្មក្នុងការលើកកម្ពស់សុខុមាលភាព សេចក្តីថ្លៃថ្នូរ និងជីវភាពរស់នៅរបស់គ្រួសារអតីតយុទ្ធជន និវត្តជន ស្របតាមអនុសាសន៍ណែនាំរបស់ សម្តេចតេជោ ហ៊ុន សែន ប្រធានសមាគម។ 

គួរបញ្ជាក់ថា គណៈប្រតិភូ និងវិនិយោគិន ខេត្តហ្គ័ងស៊ី នៃសាធារណរដ្ឋប្រជាមានិតចិនចំនួន ៦០ក្រុមហ៊ុនមកកាន់ព្រះរាជាណាចក្រកម្ពុជាដើម្បីចូលរួម «វេទិកាកិច្ចសហប្រតិបត្តិការធុរកិច្ច កម្ពុជា-ចិន» លើកដំបូង ដើម្បីស្វែងយល់ពីឱកាសវិនិយោគ និងពង្រឹងកិច្ចសហប្រតិបត្តិការសេដ្ឋកិច្ចនៅកម្ពុជា និងលើកកម្ពស់ជីវភាពអតីតយុទ្ធជន និងនិវត្តជននៅកម្ពុជាគឺមានរយៈពេល៥ថ្ងៃចាប់ពីថ្ងៃទី២១ ដល់ថ្ងៃទី២៥ ខែកក្កដា ឆ្នាំ២០២៦៕