ឧកញ៉ាបណ្ឌិត គីម ហ៊ាង អគ្គនាយកក្រុមហ៊ុន បុរី វិមានសំណាង ម.ក បានបង្ហើបឱ្យដឹងថា រឿងដែលដាច់ខាតត្រូវធ្វើបន្ទាប់ពីទទួលបានថវិកាពីទីផ្សារភាគហ៊ុន គឺក្រុមហ៊ុនរបស់លោក នឹងបញ្ចប់ហេដ្ឋារចនាសម្ព័ន្ធក្នុងបុរី វិមានសំណាង ដោយប្រើរយៈពេល ១ឆ្នាំពេញ ចាប់ពីខែតុលា ឆ្នាំ២០២៦ ដល់ខែតុលា ឆ្នាំ២០២៧។
ក្នុងបទសម្ភាសន៍មួយ កាលពីពេលថ្មីៗនេះ លោកឧកញ៉ាបណ្ឌិត បានលើកឡើងបែបនេះថា៖ “លុយលក់ភាគហ៊ុន គឺយើងរំពឹងថានឹងទទួលបាន ១០លានដុល្លារ ប៉ុន្តែជាក់ស្តែងយើងមិនដឹងថាទទួលបានចំនួនប៉ុន្មាននោះទេ។ យើងអាចបាន ១០លាន ៩លាន ៨លាន ឬ៧លានដុល្លារ ក៏យើងមិនទាន់ដឹង ប៉ុន្តែយើងព្យាយាមឱ្យទទួលបាន ១០លានដុល្លារ ហើយការងារដំបូងដែលយើងដាច់ខាតត្រូវតែធ្វើគឺ យើងត្រូវតែធ្វើឱ្យចប់ហេដ្ឋារចនាសម្ព័ន្ធនៅក្នុង បុរី វិមានសំណាង។ បុរី វិមានសំណាង មានដីទំហំ ២៥ហិកតា យើងចាប់ផ្តើមលក់ទំហំ ១០ហិកតា ហើយយើងកំពុងសាងសង់ផ្ទះជាច្រើន ភ្ញៀវកំពុងចូលស្នាក់នៅបណ្តើរៗ ហេដ្ឋារចនាសម្ព័ន្ធយើងក៏មានខ្លះ ស្ទើរខ្លះ”។
“ដូច្នេះបានជាខ្ញុំគិតថា នៅខែតុលា ឆ្នាំ២០២៦ ដល់ខែតុលា ឆ្នាំ២០២៧ រយៈពេល១ឆ្នាំពេញ គឺខ្ញុំនឹងយកលុយពីផ្សារភាគហ៊ុនប្រមាណ ៣លានដុល្លារ ដើម្បីបញ្ចប់ការសាងសង់ហេដ្ឋារចនាសម្ព័ន្ធ មានផ្លូវ លូ ទឹក ភ្លើង សួនច្បារ មាត់ព្រែក និងមានគ្រប់យ៉ាងនៅក្នុងបុរីទាំង ២៥ហិកតា។ នៅពេលបញ្ចប់ហេដ្ឋារចនាសម្ព័ន្ធរួច ពេលភ្ញៀវចូលមក គឺពេញចិត្តនិងមានគ្រប់យ៉ាងតែម្តង។ បច្ចុប្បន្ននេះមានពាក្យមួយអតិថិជននិយាយថា ម៉ូដផ្ទះបុរី វិមានសំណាង ល្អស្អាតតែម្តង ដូចនៅទីក្រុងឡុងដ៍ប្រទេសអង់គ្លេស ប៉ុន្តែនៅស្ទើរមួយចំនួន ហើយខ្ញុំក៏ដឹងថាស្ទើរកន្លែងណាដែរ ប៉ុន្តែយើងមិនអាចធ្វើតាមចិត្តនោះទេ គឺយើងធ្វើទៅតាមផែនការ”។ លោកឧកញ៉ាបណ្ឌិត បានបញ្ជាក់បន្ថែម។
សូមជម្រាបថា ក្រុមហ៊ុន បុរី វិមានសំណាង ម.ក (BVS) បានប្រកាសដាក់លក់ IPO ជាផ្លូវការ ចំនួន ១០% តម្លៃប្រមាណ ១០លានដុល្លារ ចាប់ពីថ្ងៃទី២ ខែកក្កដា រហូតដល់ថ្ងៃទី៩ ខែកញ្ញា ឆ្នាំ២០២៦។ សម្រាប់លោកអ្នកមានបំណងជួយវិនិយោគ ទៅលើមូលបត្រកម្មសិទ្ធិជាសាធារណៈលើកដំបូង (IPO) របស់ក្រុមហ៊ុន បុរី វិមានសំណាង ម.ក នោះសូមចូលតាមរយៈតំណរនេះ https://subscription.bvs.com.kh ឬទាក់ទងទៅលោកឧកញ៉ាបណ្ឌិត គីម ហ៊ាង ដោយផ្ទាល់ តាមលេខ 012 96 2000 (WhatsApp & Telegram) ឬ Email: [email protected] បានគ្រប់ពេល៕
