មន្រ្តីថ្នាក់ក្រោមជាតិម្នាក់ បច្ចុប្បន្នកំពុងកានើដំណែងជាអភិបាលរងខេត្ត មានគោរម្យងារ «ឧកញ៉ា» គឺលោក អ៊ុក គឹម សាន អភិបាលរងខេត្តព្រះវិហារ ដែលមានលោក គីម រិទ្ធី ជាអភិបាលខេត្តជាកូនប្រុសលោកទេសរដ្ឋមន្រ្តី គន់ គីម អនុប្រធានទី១ គណៈកម្មការជាតិគ្រប់គ្រងគ្រោះមហន្តរាយ។
ឧកញ៉ា អ៊ុក គឹមសាន ជាម្ចាស់ក្រុមហ៊ុន សាន់ តាណា (SANTANA AGRO PRODUCTS CO., LTD) ដែលទើបរាជរដ្ឋាភិបាល ប្រកាសតែងតាំងចូលកាន់ដំណែងជាអភិបាលរងខេត្តព្រះវិហារ នៅថ្ងៃទី២៥ ខែសីហា ឆ្នាំ២០២២។
យោងតាមអនុក្រឹត្យលេខ៦២៦ អនក្រ.តក ចុះថ្ងៃទី១២ ខែសីហា ឆ្នាំ២០២២ របស់រាជរដ្ឋាភិបាល សម្រេចតែងតាំងមន្ត្រីរាជការ ៤រូប គឺលោក មិន ស៊ីថា ឋានន្តរស័ក្ដិឧត្តមមន្ត្រីថ្នាក់លេខ៥ លោក អ៊ុក គឹមសាន ឋានន្តរស័ក្ដិឧត្តមមន្ត្រីថ្នាក់លេខ៦ លោក សុខ សាន្តតារ៉ា ឋានន្តរស័ក្ដិឧត្តមមន្ត្រីថ្នាក់លេខ៣ និងលោក យឹម បញ្ញា ឋានន្តរស័ក្ដិឧត្តមមន្ត្រីថ្នាក់លេខ៦ ជាអភិបាលរងនៃគណៈអភិបាលខេត្តព្រះវិហារ។
អតីតមន្ត្រីរដ្ឋបាលជាន់ខ្ពស់ក្រសួងមហាផ្ទៃ លោក អ៊ុក គឹមសាន កាលពីថ្ងៃទី១៣ ខែមករា ឆ្នាំ២០២១ ត្រូវបានគណបក្សប្រជាជនកម្ពុជាចាត់តាំងជាសមាជិកយុវជនគណបក្សប្រជាជនកម្ពុជាថ្នាក់កណ្តាល និងជាប្រធានក្រុមការងារយុវជនគណបក្សប្រជាជនកម្ពុជាខេត្តព្រះវិហារ ផងដែរ។
ប្រភពព័ត៌មានម្នាក់បង្ហើបប្រាប់គេហទំព័រឧកញ៉ាញូស៍បានឱ្យដឹងដែលថា អភិបាលរងខេត្តព្រះវិហារ មានងារឧកញ៉ា លោក អ៊ុក គឹមសាន ជាមនុស្សម្នាក់ស្និទ្ធស្នាលនឹងអ្នកឧកញ៉ា ទ្រី ភាព អគ្គនាយកក្រុមហ៊ុន ទ្រី ភាព គ្រុប វិនិយោគក្នុងពហុវិស័យ។
សូមបញ្ជាក់ថា លោក អ៊ុក គឹមសាន ត្រូវបានព្រះមហាក្សត្រ ផ្តល់គោរម្យងារ «ឧកញ៉ា» តាមរយៈព្រះរាជក្រឹត្យលេខ រកត/នស/០៣១៣/២៣៥ នៅថ្ងៃទី១៩ ខែមីនា ឆ្នាំ២០១៣ ជាមួយកូនប្រុសអ្នកឧកញ៉ា ទ្រី ភាព គឺលោក ទ្រី ដាលុច លោកស្រី ម៉ៅ ចំណាន និងលោក លាង ច័ន្ទមុនី៕
