នារសៀលថ្ងៃសុក្រ ទី២៤ ខែមីនា ឆ្នាំ២០២៣ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានអញ្ជើញជាអធិបតីក្នុងពិធីសម្ពោធបើកដំណើរការជាផ្លូវការ នៃគម្រោងឆ្នេរសមុទ្រគំរូរបស់រីស៊ត «ថ្ងៃបាងឆ័ត្រ» (Knai Bang Chatt) ដែលមានទីតាំងស្ថិតនៅក្រុងកែប ខេត្តកែប។
«ថ្ងៃបាំងឆ័ត្រ» ជារមណីយដ្ឋានដ៏ប្រណីត ត្រូវបានរចនាប្លង់សាងសង់ឡើងដោយស្ថាបត្យករជនជាតិបារាំង Francoise Lavielle ដែលយកលំនាំរំឭកដល់ពេលអតីតកាល នៃវីឡាមួយកាលជំនាន់អាណានិគមបារាំង។ ថ្ងៃបាំងឆ័ត្រ ជារមណីយដ្ឋាន ដែលត្រូវបានរចនាឡើងយ៉ាងល្អឥតខ្ចោះ ដែលរួមមានបន្ទប់ស្នាក់នៅ អាងហែលទឹក កន្លែងមើលទេសភាពឃើញឈូងសមុទ្រថៃ ម្ហូបអាហារលំដាប់ពិភពលោក អាហារពេលល្ងាច អាហារពេលព្រឹក និងសកម្មភាពកម្សាន្តជាច្រើនទៀត រួមទាំងការញ៉ាំកាហ្វេគយគន់ទេសភាព និងរលកសមុទ្រ ដើម្បីលំហែអារម្មណ៍ឱ្យមានភាពស្រស់ស្រាយ និងធូរស្បើយពីភាពនឿយហត់ពីការងារ ជាដើម។ ជាពិសេស «ថ្ងៃបាំងឆ័ត្រ» ជារីស៊ត ដែលមានក្លិបទូកក្តោងដំបូងគេទៀតផង។
សូមជម្រាបជូនថា ស្ថាបនិក និងជា CEO របស់រីស៊ត «ថ្ងៃបាំងឆ័ត្រ» គឺជាបុរសជនជាតិបែលហ្សិកឈ្មោះ Jef Moons។ លោក Jef Moons បានធ្វើដំណើរកម្សាន្តមកកាន់ប្រទេសកម្ពុជា ជាលើកដំបូង កាលឆ្នាំ២០០៣ ប៉ុន្តែដោយសារលោកជាប់ចិត្តស្រឡាញ់ទឹកដីប្រទេសកម្ពុជា ប្រពៃណីទំនៀបទម្លាប់របស់ប្រជាជនកម្ពុជា បានធ្វើឱ្យលោក និងមិត្តភក្តិម្នាក់ទៀត ចូលហ៊ុនគ្នាវិនិយោគលើគម្រោងមួយចំនួននៅក្រុងកែប ចាប់តាំងពីឆ្នាំ២០០៥ មកទល់បច្ចុប្បន្ន រួមទាំងរីស៊ត «ថ្ងៃបាំងឆ័ត្រ» នេះផងដែរ៕
