ក្រុមហ៊ុនឯកជនរបស់ប្រទេសកម្ពុជា បានប្តេជ្ញាជំរុញការនាំចេញផ្លែឈើសម្ងួតកែច្នៃដូចជា ដំណាប់ស្វាយ ចេក ម្នាស់ ទៅកាន់ទីផ្សារអន្តរជាតិឱ្យកាន់តែប្រសើរថែមទៀត។នេះបើតាមជំនួបពិភាក្សារវាង លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ ជាមួយតំណាងក្រុមហ៊ុន Kölnmesse ដែលជាក្រុមហ៊ុនរៀបចំពិព័រណ៍ ANUGA អំពីយុទ្ធសាស្ត្រ និងវិធីសាស្ត្រក្នុងការត្រៀមលក្ខណៈរៀបចំ “ពន្លាជាតិ” (Country Pavilion) សម្រាប់ពិព័រណ៍ ANUGA នាពេលបន្ទាប់ នៅប្រទេសអាល្លឺម៉ង់ កាលថ្ងៃទី៥ ខែតុលា ឆ្នាំ២០២៥។
ជំនួបពិភាក្សាការងារនេះ ធ្វើឡើងក្នុងគោលបំណងដើម្បីបង្កើនការយល់ដឹង និងការរៀបចំផែនការពង្រឹងវត្តមានផលិតផលកម្ពុជាឱ្យកាន់តែលេចធ្លោនៅក្នុងពិព័រណ៍ម្ហូបអាហារ និងភេសជ្ជៈធំជាងគេបំផុតលំដាប់ពិភពលោក។តាមរយៈជំនួបនេះ លោក Valentin Tran នាយកប្រតិបត្តិនៃក្រុមហ៊ុន Andros Vietnam និង លោកស្រី Coree Carver នៃក្រុមហ៊ុន Grove Fruit Growers ក៏បានពិភាក្សាពីឱកាសសហប្រតិបត្តិការដើម្បីជំរុញការនាំចេញផលិតផលសក្តានុពលរបស់កម្ពុជា ជាពិសេសផលិតផលផ្លែឈើសម្ងួតកែច្នៃដូចជា ដំណាប់ស្វាយ ចេក និងម្នាស់ ផងដែរ។
បន្ថែមពីនេះ គណៈប្រតិភូកម្ពុជា ក៏បានផ្លាស់ប្តូរការយល់ដឹងអំពីការអភិវឌ្ឍទីផ្សារ ភាពច្នៃប្រឌិតក្នុងការកែច្នៃផលិតផល និងយុទ្ធសាស្ត្របង្កើនការសហការអាជីវកម្មទាំងក្នុងស្រុកនិងក្រៅស្រុក។ ទន្ទឹមនឹងនេះ ក៏មានការលើកឡើងពីការប្ដេជ្ញាចិត្តក្នុងការការពង្រឹងគុណភាពផលិតផល និងការបង្កើតភាពជាដៃគូរយៈពេលវែង ដើម្បីបង្កើនសមត្ថភាពប្រកួតប្រជែងនៃផលិតផលកសិកម្មកម្ពុជា ផងដែរ។
សូមជម្រាបថា ចាប់ពីខែមករា ដល់ខែមិថុនា ឆ្នាំ២០២៥នេះ កម្ពុជាបាននាំចេញទំនិញក្នុងតម្លៃជាង ១៤.២៩ពាន់លានដុល្លារ កើនឡើង១៦.២% ចំណែកការនាំចូលទំនិញមកវិញមានតម្លៃ ១៦.២៧ពាន់លានដុល្លារ កើនឡើង១៨% បើធៀបនឹងរយៈពេលដូចគ្នាកាលឆ្នាំ២០២៤៕អត្ថបទ៖ហ្សាលីន
