ក្រសួងពាណិជ្ជកម្ម បានចេញសេចក្ដីជូនដំណឹងស្ដីពីការកំណត់ថ្លៃលក់រាយប្រេងឥន្ធនៈនៅតាមបណ្តាស្ថានីយទូទាំងប្រទេស ដោយកំណត់ឱ្យលក់ប្រេងសាំងធម្មតា (Gasoline 92) ក្នុងតម្លៃ ៥ ០៥០ រៀល/លីត្រ និងប្រេងម៉ាស៊ូត (Gasoil 10ppm) ក្នុងតម្លៃ ៥ ៥៥០ រៀល/លីត្រ។ តម្លៃថ្មីនេះ ត្រូវចាប់ផ្តើមអនុវត្តជាផ្លូវការចាប់ពីវេលាម៉ោង ១ រសៀលថ្ងៃទី២១ ខែតុលា រហូតដល់ថ្ងៃទី១ ខែវិច្ឆិកា ឆ្នាំ២០២៦។
ក្រសួងពាណិជ្ជកម្ម បានគូសបញ្ជាក់ថា ផ្អែកតាមសភាពការណ៍ និងការបន្តកើនឡើងនៃថ្លៃប្រេងឥន្ធនៈ ថ្លៃដឹកជញ្ជូន និងថ្លៃធានារ៉ាប់រងនៅលើទីផ្សារអន្តរជាតិ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចដាក់ចេញនូវវិធានការអន្តរាគមន៍ពន្ធ និងអាករជាបន្ទាន់ ដើម្បីទប់ទល់នឹងការឡើងថ្លៃ និងជួយសម្រាលបន្ទុកជីវភាពរបស់ប្រជាពលរដ្ឋ។
វិធានការអន្តរាគមន៍គន្លឹះរបស់រាជរដ្ឋាភិបាលរួមមាន៖ ១. បន្ដបញ្ចុះចំនួន ៦,៥សេនដុល្លារ/លីត្រ ក្នុងគោលបំណងជួយសម្រួលដល់ជីវភាពរបស់ប្រជាពលរដ្ឋ ២. បន្ដបញ្ចុះ ១សេនដុល្លារ/លីត្របន្ថែមទៀត ដោយសារតម្លៃប្រេងសាំងអន្តរជាតិឡើងលើសពី ៩០ដុល្លារ/បារ៉ែល និងប្រេងម៉ាស៊ូតអន្តរជាតិឡើងលើស ១០០ដុល្លារ/បារ៉ែល ៣. ពន្ធគយ ០ (សូន្យ) ដុល្លារ។
ផ្អែកតាមសភាពការណ៍ និងថ្លៃប្រេងឥន្ធនៈបន្តកើនឡើងនៅលើទីផ្សារអន្តរជាតិ ក៏ដូចជាថ្លៃដឹកជញ្ជូននិងថ្លៃធានារ៉ាប់រងមានការកើនឡើងខ្ពស់ សម្តេចធិបតីនាយករដ្ឋមន្ត្រី បានសម្រេច បញ្ចុះអាករបន្ថែមលើប្រេងសាំង និងប្រេងម៉ាស៊ូតមក ០ (សូន្យ) ដុល្លារ, បញ្ចុះអាករពិសេសលើប្រេងសាំងពី ៣០% មក ១៥% និងប្រេងម៉ាស៊ូត ពី ៤% មក ០% និងបញ្ចុះអាករលើតម្លៃបន្ថែមលើប្រេងសាំងពី ១០% មក ៥% និងប្រេងម៉ាស៊ូត ពី ១០% មក ០% ដោយរាជរដ្ឋាភិបាលទទួលបន្ទុកជំនួសសរុបចំនួន ៦% សម្រាប់ប្រេងសាំង និង ១០% សម្រាប់ប្រេងម៉ាស៊ូត៕
