ពិធីនេះត្រូវបានធ្វើឡើងនៅថ្ងៃទី៦ ខែតុលា ឆ្នាំ២០២៦ នៅសណ្ឋាគារកាំបូឌីយ៉ាណា ដោយមានការអញ្ជើញចូលរួមដ៏ខ្ពង់ខ្ពស់ពីលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ, អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធាននៃក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា, ចាស់ព្រឹទ្ធាចារ្យ វីរសិល្បកររៀមច្បង និងបងប្អូនសិល្បករ សិល្បការិនី។

អ្នកឧកញ៉ាប្រធាន បានសម្តែងនូវក្តីសោមនស្សរីករាយ និងកិត្តិយសក្រៃលែង ដែលបានរៀបចំកម្មវិធីជួបជុំជាមួយវីរសិល្បករ និងសិល្បកររៀមច្បងជាថ្មីម្តងទៀត តាមការសន្យា ពិសេសស្របគ្នានឹងឱកាសនៃពិធីបុណ្យភ្ជុំបិណ្ឌ ដែលជាពិធីបុណ្យប្រពៃណីដ៏មានអត្ថន័យជ្រាលជ្រៅសម្រាប់ប្រជាជនខ្មែរ។ បុណ្យភ្ជុំបិណ្ឌ គឺជាពេលវេលាដែលកូនខ្មែរជួបជុំគ្នា ដើម្បីរំឭកគុណ និងធ្វើបុណ្យឧទ្ទិសកុសលជូនដល់បុព្វការីជន និងអ្នកមានគុណដែលបានចែកឋានទៅ។ ប៉ុន្តែការជួបជុំនៅថ្ងៃនេះ គឺជាឱកាសសម្រាប់យើងទាំងអស់គ្នារំឭកគុណចំពោះអ្នកមានគុណក្នុងវិស័យសិល្បៈ និងវប្បធម៌ខ្មែរ ដែលនៅមានជីវិត និងកំពុងអង្គុយជួបជុំគ្នានៅទីនេះយ៉ាងរីករាយ។

អ្នកឧកញ៉ា ម៉ៅ ចំណាន គិតម៉េង មានប្រសាសន៍ថា បុព្វបុរសបានបន្សល់ទុកមរតកឱ្យយើង ហើយវីរសិល្បករ និងសិល្បកររៀមច្បង គឺជាអ្នកបន្តទទួលមរតកនោះ បន្តថែរក្សា បន្តសម្តែង បន្តបង្រៀន និងបន្តប្រគល់មកឱ្យយើងជាអ្នកបន្តជំនាន់។ ដូច្នេះ នៅថ្ងៃនេះ យើងមិនត្រឹមតែជួបគ្នាដើម្បីសួរសុខទុក្ខទេ ប៉ុន្តែយើងមកដើម្បីនិយាយពាក្យថា៖ «សូមអរគុណ!» សូមអរគុណចំពោះការលះបង់គ្រប់យ៉ាង ដើម្បីសិល្បៈ និងវប្បធម៌ខ្មែរ។ សូមអរគុណចំពោះបទពិសោធន៍ ចំណេះដឹង និងស្នាដៃដែលបានបន្សល់ទុក។ ហើយសូមអរគុណជាពិសេសចំពោះការថែរក្សា ការពារអត្តសញ្ញាណសិល្បៈ និងវប្បធម៌ខ្មែរ ឱ្យបន្តរស់រានរហូតមកដល់ជំនាន់ក្រោយ។

ក្នុងនាមសមាគមសិល្បករខ្មែរ អ្នកឧកញ៉ា ម៉ៅ ចំណាន គិតម៉េង សូមប្តេជ្ញាថា នឹងដើរតាមមាគ៌ាដ៏ប្រពៃរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន, សម្តេចធិបតី ហ៊ុន ម៉ាណែត និងលោកជំទាវបណ្ឌិត ចំពោះការគាំពារដល់វីរសិល្បករ និងសិល្បកររៀមច្បង ដែលបានលះបង់កម្លាំងកាយចិត្តក្នុងការបម្រើ និងថែរក្សាវប្បធម៌ជាតិ។ សម្តេចតែងជួយសម្រាលទុក្ខលំបាក ផ្តល់ក្តីសង្ឃឹម និងការគាំទ្រផ្នែកជីវភាពដល់សិល្បករចាស់ៗ ដែលបាត់បង់លទ្ធភាពសម្តែង ឬបម្រើវិស័យសិល្បៈ៕

The post អ្នកឧកញ៉ា ម៉ៅ ចំណាន គិតម៉េង រៀបចំកម្មវិធីសំណេះសំណាល និងពិសាអាហារសាមគ្គីជាមួយវីរសិល្បករ និងសិល្បកររៀមច្បង ដើម្បីរំឭកគុណ ក្នុងឱកាសបុណ្យភ្ជុំបិណ្ឌ appeared first on .

សមាគមសិល្បករខ្មែរ បានឱ្យដឹងថា តាមរយៈ​កិច្ចសហប្រតិបត្តិការនេះ បាន​ស្តែងឱ្យឃើញពីការប្តេជ្ញាចិត្តរួមគ្នាក្នុងការគាំទ្រដល់សិល្បករខ្មែរ ដោយការពង្រីកវិសាលភាព​នៃការទទួលបានកិច្ចការពារធានារ៉ាប់រងអាយុជីវិត ការលើកកម្ពស់ចំណេះដឹងផ្នែកហិរញ្ញវត្ថុ និងការលើកទឹកចិត្តឱ្យមានការរៀបចំផែនការហិរញ្ញវត្ថុក្នុងរយៈពេលវែង។ តាមរយៈកិច្ចសហការនេះ ស្ថាប័នទាំងពីរមានគោលបំណងជួយសិល្បករ និងគ្រួសាររបស់ពួកគាត់ក្នុងការពង្រឹងផ្នែកហិរញ្ញវត្ថុឱ្យកាន់តែរឹងមាំ ខណៈពេលដែលពួកគាត់បន្តចូលរួមចំណែកដល់បេតិកភណ្ឌវប្បធម៌ដ៏សម្បូរបែបរបស់កម្ពុជា។

តាមរយៈកិច្ចព្រមព្រៀងនេះ ក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន និងសមាគមសិល្បករខ្មែរ នឹងសហការរួមគ្នាដើម្បី៖

– បង្កើនការយល់ដឹងអំពីសារៈសំខាន់នៃសេវាធានារ៉ាប់រងអាយុជីវិត និង លើកកម្ពស់ចំណេះដឹងផ្នែកហិរញ្ញវត្ថុ ដើម្បីជួយសិល្បករ និងក្រុមគ្រួសាររបស់ពួកគាត់។

– ផ្តល់ជូននូវដំណោះស្រាយធានារ៉ាប់រងអាយុជីវិត ប្រកបដោយភាពងាយស្រួល និងសមស្របតាមតម្រូវការរបស់សមាជិកសមាគមសិល្បករខ្មែរ។

– អភិវឌ្ឍគំនិតផ្តួចផ្តើមផ្តាច់មុខ សម្រាប់សមាជិកនៃសមាគមសិល្បករខ្មែរ តាមរយៈកម្មវិធីណែនាំបន្ត (Referral Program) ដែលបង្កើតឡើងដោយក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន និងសមាគមសិល្បករខ្មែរ ដែលជាផ្នែកមួយនៃការប្តេជ្ញាចិត្តរួមគ្នាក្នុងការការពារផែនការហិរញ្ញវត្ថុសម្រាប់ក្រុមគ្រួសារកម្ពុជា។

លោក អ៊ុត សឿង អគ្គនាយកក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន ម.ក បានមានប្រសាសន៍ថា៖ “សិល្បករ គឺជាបេះដូងនៃវប្បធម៌កម្ពុជា។ តាមរយៈគំនិតច្នៃប្រឌិត និងការលះបង់របស់ពួកគាត់ដែលបានថែរក្សាប្រពៃណី បំផុសគំនិតល្អៗ និងបង្កើតអត្តសញ្ញាណជាតិរបស់យើង។ ក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន យើងជឿជាក់ថា ពួកគាត់គឺសក្តិសមទទួលបានការការពារផ្នែកហិរញ្ញវត្ថុ ក៏ដូចជាភាពកក់ក្តៅក្នុងចិត្ត។ កិច្ចព្រមព្រៀងដៃគូនេះ ស្តែងឱ្យឃើញពីការប្តេជ្ញាចិត្តរបស់យើងក្នុងការធ្វើឱ្យសេវាធានារ៉ាប់រងអាយុជីវិតកាន់តែងាយស្រួល ព្រមទាំងគាំទ្រដល់សុខុមាលភាពរយៈពេលវែងជូនសិល្បករខ្មែរ និងគ្រួសាររបស់ពួកគាត់”៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ចុះ MoU ជាមួយ​ក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន ម.ក ប្រកាស​ផ្តល់សេវាធានារ៉ាប់រង​អាយុជីវិតដល់សិល្បករខ្មែរ appeared first on .

សមាគមសិល្បករខ្មែរ បានឱ្យដឹងថា នេះជាការបត់បែន និងទស្សនវិស័យថ្មីសម្រាប់សិល្បករខ្មែរ ដើរឱ្យទាន់​សម័យកាល ក្នុងនោះលោកជំទាវអ្នកឧកញ៉ា ម៉ៅ ចំណាន គិតម៉េង បានគូសបញ្ជាក់ថា ក្រៅពីភារកិច្ចអភិរក្ស និងលើកកម្ពស់វប្បធម៌ សិល្បករត្រូវតែ «ដើរឱ្យទាន់របត់ពិភពលោក និងបច្ចេកវិទ្យាសកល» ដោយចាប់យកបំនិន​ជីវិតថ្មីផ្នែកហិរញ្ញវត្ថុ ដើម្បីបង្កើតប្រភពចំណូលអកម្មបន្ថែម។

ម្យ៉ាងទៀត នេះជាខែលការពារសិល្បករពីការឆបោក ព្រោះការបណ្តុះបណ្តាលនេះជួយឱ្យសិល្បករ​យល់ដឹងពី​ការគ្រប់គ្រងហានិភ័យ និងការវិនិយោគត្រឹមត្រូវ ដើម្បីចៀសវាងពីការឆបោកហិរញ្ញវត្ថុផ្សេងៗ។ សិល្បករ-សិល្បការិនី នឹងប្រើប្រាស់ឥទ្ធិពល និងបណ្តាញសង្គម (Followers) របស់ខ្លួន ដើម្បីចែករំលែកចំណេះដឹង​ហិរញ្ញវត្ថុដ៏ត្រឹមត្រូវនេះ បន្តទៅកាន់សាធារណជន និងអ្នកគាំទ្រ។

ការទទួលបានអត្ថប្រយោជន៍ផ្ទាល់ៗរបស់សិល្បករ នៅក្នុងព្រឹត្តិការណ៍នេះ សិល្បករ-សិល្បការិនីទាំងអស់ដែល​បានចូលរួម ទទួលបាននូវកញ្ចប់ប្រយោជន៍ភ្លាមៗសម្រាប់ការអនុវត្តជាក់ស្តែង រួមមាន៖ លេខអត្តសញ្ញាណ​វិនិយោគិន (Investor ID) ដោយសេរី និងមិនគិតថ្លៃ, គណនីជួញដូរភាគហ៊ុន បើកជូនដោយឥតគិតថ្លៃ, ភាគហ៊ុនចំនួន ៥ ភាគហ៊ុន (ក្រុមហ៊ុន Cellcard / CAM GSM) ស្មើនឹងទឹកប្រាក់ ១៥,០០០ រៀល ដើម្បីសាកល្បងទិញ-លក់ក្នុងទីផ្សារជាក់ស្តែង។

ឯកឧត្តម ស៊ូ សុជាតិ (អគ្គនាយក ន.ម.ក.) បានមានប្រសាសន៍សង្កត់ធ្ងន់ថា៖ «សិល្បៈបង្កើតតម្លៃតាម​រយៈ​ទេពកោសល្យ និងការច្នៃប្រឌិត ខណៈការវិនិយោគបង្កើតតម្លៃតាមរយៈចក្ខុវិស័យ។ សិល្បករគឺជាបុគ្គលមាន​ឥទ្ធិពលលើការគិតរបស់សាធារណជន ក្នុងការបណ្តុះវប្បធម៌វិនិយោគនៅកម្ពុជា»។

ឯកឧត្តមបន្តថា សិល្បករ និងសិល្បការិនី គឺជាបុគ្គលមានឥទ្ធិពលលើការគិត និងអាកប្បកិរិយារបស់សាធារណជន ដូច្នេះការចូលរួមរបស់ពួកគេនឹងជួយផ្សព្វផ្សាយចំណេះដឹងហិរញ្ញវត្ថុ ពង្រឹងទំនុកចិត្តលើទីផ្សារមូលបត្រ និងរួម​ចំណែកកសាងវប្បធម៌វិនិយោគប្រកបដោយចំណេះដឹង ដែលជាមូលដ្ឋានសម្រាប់ការអភិវឌ្ឍវិស័យមូលបត្រ និងកំណើនសេដ្ឋកិច្ចប្រកបដោយចីរភាព៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ដឹកនាំរៀបចំសិក្ខាសាលាបណ្តុះបណ្តាលសិល្បករ ជាង ១០០នាក់ ពីចំណេះដឹងឧបករណ៍ហិរញ្ញវត្ថុ និងឱកាសវិនិយោគក្នុងទីផ្សារមូលបត្រ appeared first on .

ពិធីនេះបានប្រព្រឹត្តទៅនៅថ្ងៃទី១ ខែសីហា ឆ្នាំ២០២៦ ក្រោមអធិបតីភាព សម្តេចកិត្តិសង្គហបណ្ឌិត ម៉ែន សំអន ឧត្តមក្រុមប្រឹក្សាព្រះមហាក្សត្រ ដោយមានការចូលរួមពីមន្ត្រីជាន់ខ្ពស់រាជរដ្ឋាភិបាល, អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងតំណាងវិស័យឯកជនជាច្រើនរូប។

ការចូលរួមរបស់លោកជំទាវអ្នកឧកញ៉ា ម៉ៅ ចំណាន គិតម៉េង និងសិល្បករ-សិល្បការិនី នៃសមាគមសិល្បករខ្មែរ ដើម្បីអបអរសាទរការវិនិយោគរោងចក្រថ្មីរបស់ក្រុមហ៊ុន ជីប ម៉ុង ក្នុងនាមជាក្រុមហ៊ុន ដែលបានឧបត្ថម្ភទ្រទ្រង់ធំ​មួយ​ដល់​សមាគមសិល្បករខ្មែរជាប្រចាំឆ្នាំរយៈពេល ១០ឆ្នាំ។

សូមជម្រាបថា ក្រុមហ៊ុន ជីប ម៉ុង បានបោះទុនវិនិយោគប្រមាណ ២៥០ លានដុល្លារអាមេរិក លើការសាងសង់​រោងចក្រ​ផលិតអាហារ និងភេសជ្ជៈដ៏ទំនើប ដែលរួមមានផលិតផលទឹកដោះគោ មី និងតែ ដោយសហការជាមួយ​ក្រុមហ៊ុន​បច្ចេកវិទ្យាលំដាប់ពិភពលោកមកពីប្រទេសអាល្លឺម៉ង់ និងបារាំង។

រោងចក្រថ្មីនេះ គឺជាការវិនិយោគរយៈពេលវែងរបស់ក្រុមហ៊ុន ជីប ម៉ុង ក្នុងគោលបំណងពង្រឹងសមត្ថភាពផលិត​ក្នុងស្រុក បង្កើនតម្លៃបន្ថែមលើវត្ថុធាតុដើមកម្ពុជា និងរួមចំណែកជំរុញការអភិវឌ្ឍវិស័យផលិតកម្ម ដែលជាមូលដ្ឋាន​សំខាន់​សម្រាប់ការកសាងសេដ្ឋកិច្ចជាតិប្រកបដោយភាពរឹងមាំ និងចីរភាព៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ដឹកនាំសិល្បករ-សិល្បការិនី ចូលរួមអបអរសាទរពិធីបើកការដ្ឋាន​សាងសង់រោងចក្រផលិតអាហារ និងភេសជ្ជៈ របស់ក្រុមហ៊ុន ជីប ម៉ុង appeared first on .

ពិធីនេះបានប្រព្រឹត្តទៅនៅការិយាល័យធនាគារ J Trust Royal Bank ស្ថិតក្នុងអគារ Royal Group Central Tower ក្រោមវត្តមានរបស់ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ និង លោក Toru Myochin នាយកប្រតិបត្តិ ធនាគារ J Trust Royal Bank ថ្នាក់ដឹកនាំក្រុមហ៊ុន Royal Group of Companies ថ្នាក់ដឹកនាំធនាគារ ភ្ញៀវកិត្តិយស និងសិល្បករ សិល្បការិនីជាច្រើនរូប។

ថ្លែងក្នុងពិធីនេះ លោក Toru Myochin នាយកប្រតិបត្តិ ធនាគារ J Trust Royal Bank បានមានប្រសាសន៍ថា ក្នុងនាមជាជនជាតិជប៉ុន​​ដែលរស់នៅ និងបំពេញការងារនៅកម្ពុជា លោកបានកោតសរសើរយ៉ាងជ្រាលជ្រៅ​ចំពោះតម្លៃនៃអរិយធម៌ និងវប្បធម៌ដ៏សម្បូរបែបរបស់កម្ពុជា។ លោកលើកឡើងថា ភាពរឹងមាំរបស់ប្រទេសមួយ មិនត្រូវបានវាស់ស្ទង់ត្រឹមកំណើនសេដ្ឋកិច្ចប៉ុណ្ណោះទេ ប៉ុន្តែជា​ការរួមបញ្ចូលនូវ​សមត្ថភាពក្នុងការអភិរក្ស និងលើកតម្កើងអត្តសញ្ញាណវប្បធម៌របស់ខ្លួនផងដែរ។

លោកបានបញ្ជាក់ថា ធនាគារ J Trust Royal Bank មានមោទនភាពដែលបានរួមចំណែកគាំទ្រការអភិរក្ស និងផ្សព្វផ្សាយមរតកសិល្បៈវប្បធម៌ខ្មែរ និងអំពាវនាវឱ្យគ្រប់ភាគីបន្តសហការគ្នា ដើម្បីធានាថាសិល្បៈខ្មែរ​នឹងបន្តរីកចម្រើន និងបំផុសគំនិតដល់មនុស្សជំនាន់ក្រោយ។

ជាការឆ្លើយតប លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ បានថ្លែងអំណរគុណ​យ៉ាងជ្រាលជ្រៅចំពោះធនាគារ J Trust Royal Bank និង Royal Group of Companies ដែលបានបន្តគាំទ្រ​សកម្មភាព​របស់សមាគមជាបន្តបន្ទាប់។ លោកជំទាវបានលើកឡើងថា ការឧបត្ថម្ភនេះបានឆ្លុះបញ្ចាំង​ពីទំនួលខុស​ត្រូវសង្គម និងចក្ខុវិស័យវែងឆ្ងាយរបស់វិស័យឯកជន ក្នុងការចូលរួមអភិរក្ស និងលើកកម្ពស់មរតកវប្បធម៌ជាតិ។

លោកជំទាវបានបញ្ជាក់ថា ថវិកាឧបត្ថម្ភដែលសមាគមទទួលបាន នឹងត្រូវប្រើប្រាស់ដោយតម្លាភាព និងប្រសិទ្ធភាព សម្រាប់គាំទ្រសកម្មភាពអភិរក្ស និងអភិវឌ្ឍសិល្បៈ វប្បធម៌ ជួយដល់សិល្បករ និងសិល្បការិនីដែលជួបការលំបាក បណ្តុះបណ្តាលយុវជនជំនាន់ក្រោយ និងផ្សព្វផ្សាយតម្លៃសិល្បៈវប្បធម៌ខ្មែរ ទាំងក្នុង និងក្រៅប្រទេស។

ជាមួយគ្នា​នោះ លោកជំទាវអ្នកឧកញ៉ា ក៏បានអំពាវនាវដល់ស្ថាប័នរដ្ឋ វិស័យឯកជន សប្បុរសជន និងសិល្បករ សិល្បការិនីទាំងអស់ បន្តចូលរួមគាំទ្រសកម្មភាពរបស់សមាគមសិល្បករខ្មែរ ដើម្បីរួមគ្នាថែរក្សា អភិរក្ស និងលើក​ស្ទួយសិល្បៈ វប្បធម៌ និងអត្តសញ្ញាណជាតិខ្មែរ ឱ្យស្ថិតស្ថេរគង់វង្សសម្រាប់មនុស្សជំនាន់ក្រោយ។

ពិធីប្រគល់-ទទួលថវិកានេះ បានបង្ហាញពីភាពជាដៃគូដ៏រឹងមាំរវាងសមាគមសិល្បករខ្មែរ និងធនាគារ J Trust Royal Bank ក្នុងការរួមចំណែកអភិវឌ្ឍសង្គម តាមរយៈការអភិរក្សវប្បធម៌ លើកកម្ពស់សុខុមាលភាពសិល្បករ និងជំរុញការអភិវឌ្ឍប្រកបដោយចីរភាពនៅកម្ពុជា៕

The post លោកជំទាវអ្នកឧកញ៉ា ម៉ៅ ចំណាន គិតម៉េង អញ្ជើញជាអធិបតីក្នុងពិធីទទួលថវិកាឧបត្ថម្ភ ចំនួន ១០០,០០០ ដុល្លារអាមេរិក ពីធនាគារ J Trust Royal Bank ជូនដល់សមាគមសិល្បករខ្មែរ appeared first on .

សមាគមសិល្បករខ្មែរ បានឱ្យដឹងថា ពិធីចុះហត្ថលេខានេះ បានប្រព្រឹត្តទៅក្រោមវត្តមានដ៏ខ្ពង់ខ្ពស់របស់ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ, ឧកញ៉ា គិត លីច័ន្ទផាន់ណា អនុប្រធាន និងជាទីប្រឹក្សាជាន់ខ្ពស់សមាគម​សិល្បករខ្មែរ ព្រមទាំងជាអគ្គនាយកប្រតិបត្តិក្រុមហ៊ុន KLYP Investments និងលោក ម៉ា អ៊ែមមឺសិន ម៉ានី នាយកប្រតិបត្តិនៃមន្ទីរពេទ្យអឃីត និងជានាយកគ្រប់គ្រងប្រចាំប្រទេសកម្ពុជា រួមជាមួយថ្នាក់ដឹកនាំ ក្រុមគ្រូពេទ្យ បុគ្គលិក សិល្បករ សិល្បការិនី និងភ្ញៀវកិត្តិយសជាច្រើនរូប។

ក្នុងឱកាសនោះ ឧកញ៉ា គិត លីច័ន្ទផាន់ណា បានថ្លែងសុន្ទរកថាតំណាងលោកជំទាវអ្នកឧកញ៉ា ម៉ៅ ចំណាន គិតម៉េង ដោយគូសបញ្ជាក់ថា កិច្ចសហការនេះ គឺជាការបង្ហាញពីឆន្ទៈរួមក្នុងការលើកកម្ពស់គុណភាពជីវិត និងការទទួលបានសេវាសុខាភិបាលប្រកបដោយគុណភាពសម្រាប់សិល្បករ សិល្បការិនីទូទាំងប្រទេស ជាពិសេសសិល្បកររៀមច្បង ដែលបានលះបង់ពេលវេលា កម្លាំងកាយចិត្ត និងទេពកោសល្យក្នុងការអភិរក្ស និងផ្សព្វផ្សាយសិល្បៈវប្បធម៌ជាតិ។

លោកបានមានប្រសាសន៍ថា៖ «សិល្បករ សិល្បការិនី គឺជាធនធានដ៏មានតម្លៃរបស់សង្គម និងជាអ្នកថែរក្សាអត្ត​សញ្ញាណ​ជាតិខ្មែរ។ ការយកចិត្តទុកដាក់លើសុខភាព សេចក្ដីថ្លៃថ្នូរ និងសុខុមាលភាពរបស់ពួកគាត់ គឺជាកាតព្វកិច្ច​ដែលយើងទាំងអស់គ្នាត្រូវរួមគ្នាគាំពារ និងថែរក្សា»។

តាមរយៈអនុស្សរណៈយោគយល់នេះ សមាជិកសមាគមសិល្បករខ្មែរ នឹងទទួលបានអត្ថប្រយោជន៍ជាច្រើន ពីមន្ទីរ​ពេទ្យអឃីត កោះពេជ្រ និងមន្ទីរពហុព្យាបាល អឃីត សែនសុខ រួមមានសេវាពិនិត្យ ព្យាបាល និងការថែទាំ​សុខភាព​ប្រកប​ដោយគុណភាព ព្រមទាំងលក្ខខណ្ឌអនុគ្រោះផ្សេងៗទៀត។

ជាមួយគ្នានេះ កិច្ចសហការនេះក៏បានបង្ហាញពីការប្តេជ្ញាចិត្តរបស់មន្ទីរពេទ្យអឃីត ក្នុងការអនុវត្តទំនួលខុស​ត្រូវសង្គម និងសកម្មភាពមនុស្សធម៌ តាមរយៈការគាំទ្រដល់សហគមន៍សិល្បករកម្ពុជា និងរួមចំណែកដល់​និរន្តរភាព​នៃវិស័យសិល្បៈវប្បធម៌ជាតិ។

ដោយឡែក លោក ម៉ា អ៊ែមមឺសិន ម៉ានី នាយកប្រតិបត្តិនៃមន្ទីរពេទ្យអឃីត និងជានាយកគ្រប់គ្រងប្រចាំ​ប្រទេស​កម្ពុជា បានបញ្ជាក់ថា កិច្ចសហប្រតិបត្តិការនេះ គឺជាជំហានដ៏សំខាន់ក្នុងការលើកកម្ពស់ការយល់ដឹង​ផ្នែកសុខភាព​ទៅកាន់សាធារណជន តាមរយៈការចូលរួមផ្សព្វផ្សាយសារសុខភាពដោយសមាគមសិល្បករខ្មែរ ដែលមានឥទ្ធិពល​វិជ្ជមាន​ដល់មហាជន។

លោកបានថ្លែងថា៖ «ក្នុងនាមជាមន្ទីរពេទ្យខ្មែរ យើងមានមោទនភាពក្នុងការប្រើប្រាស់ចំណេះជំនាញ និងវិជ្ជាជីវៈ មកបម្រើជាតិមាតុភូមិ ដោយភាពស្មោះត្រង់ និងទំនុកចិត្ត។ រាល់ការខិតខំប្រឹងប្រែងរបស់យើង គឺដើម្បីធានាបាន​នូវសុខសុវត្ថិភាព សុខភាព និងស្នាមញញឹមសម្រាប់ប្រជាជនខ្មែរ»។

ភាគីទាំងពីរ បានសម្តែងនូវជំនឿជាក់ថា កិច្ចសហការនេះនឹងបន្តរីកចម្រើន និងអាចក្លាយជាគំរូសម្រាប់ការពង្រីក​កិច្ចសហប្រតិបត្តិការរវាងវិស័យឯកជន និងស្ថាប័នវប្បធម៌ផ្សេងៗទៀតនៅកម្ពុជា។

សមាគមសិល្បករខ្មែរ បានបញ្ជាក់ថា នឹងបន្តស្វែងរកកិច្ចសហការនានា ដើម្បីគាំទ្រសិល្បករ សិល្បការិនី លើផ្នែកសុខុមាលភាព សង្គមកិច្ច និងការអភិវឌ្ឍជីវភាព ខណៈដែលមន្ទីរពេទ្យអឃីត ក៏នឹងបន្តបេសកកម្មផ្តល់​សេវាសុខាភិបាលប្រកបដោយគុណភាព សុវត្ថិភាព និងការយកចិត្តទុកដាក់ខ្ពស់ជូនដល់ប្រជាជនកម្ពុជា។

The post លោកជំទាវអ្នកឧកញ៉ា ម៉ៅ ចំណាន គិតម៉េង អញ្ជើញចុះ MoU រវាងសមាគមសិល្បករខ្មែរ និងមន្ទីរពេទ្យអឃីត ដើម្បីលើកកម្ពស់សុខុមាលភាពសិល្បករ និងផ្សព្វផ្សាយការយល់ដឹងសុខភាពដល់ពលរដ្ឋ appeared first on .

សមាគមសិល្បករខ្មែរ ផលិតកម្មបារមី និង Sabay Events Production បានសម្ដែងការស្វាគមន៍យ៉ាងអស្ចារ្យ​ជូនអ្នកឧបត្ថម្ភផ្លូវការនៃកម្មវិធី «Rise for Khmer»។ ក្រុមហ៊ុនឧបត្ថម្ភធំៗទាំងនោះរួមមាន អ្នកឧបត្ថម្ភ Platinum គឺក្រុមហ៊ុន រ៉ូយ៉ាល់ គ្រុប (Royal Group of Companies) របស់អ្នកឧកញ៉ា គិត ម៉េង និងក្រុមហ៊ុន ជីប ម៉ុង លែន (Chip Mong Land) បុត្រសម្ព័ន្ធក្រុមហ៊ុន ជីប ម៉ុង ដែលមាន លោកអ្នកឧកញ៉ា ភាព ហៀក, លោកអ្នកឧកញ៉ា លាង ឃុន និងអ្នកឧកញ៉ា លាង ម៉េង ជាសហស្ថាបនិក។ រីឯអ្នកឧបត្ថម្ភ Gold គឺក្រុមហ៊ុន វិនិយោគទុនអណិកជនកម្ពុជា OCIC (Overseas Cambodian Investment Corporation) របស់​លោកអ្នកឧកញ៉ា ពុង ឃាវសែ។

សមាគមសិល្បករខ្មែរ បាននបញ្ជាក់ថា សមាគមពិតជាមានកិត្តិយសយ៉ាងធំធេង ដែលបានសហការជាមួយ​អ្នកឧបត្ថម្ភ ដើម្បីនាំយកសិល្បៈ វប្បធម៌ និងសំឡេងខ្មែរទៅកាន់ឆាកអន្តរជាតិ។ នេះជាជំហានដ៏មានន័យមួយ​ដើម្បីឱ្យសិល្បៈខ្មែរត្រូវបានពិភពលោកទទួលស្គាល់ និងអបអរសាទរយ៉ាងពេញទំហឹង។ ការប្រគំតន្ត្រី «The Rise for Khmer» មិនត្រឹមតែជាព្រឹត្តិការណ៍វប្បធម៌ដ៏សំខាន់ប៉ុណ្ណោះទេ តែក៏ជាបេសកកម្មមនុស្សធម៌ និងសង្គមដ៏មាន​អត្ថន័យជ្រាលជ្រៅផងដែរ។

The post ក្រុមហ៊ុនធំៗរបស់លោកអ្នកឧកញ៉ា អ្នកឧកញ៉ា ចំនួន៣ ប្រកាសឧបត្ថម្ភផ្លូវការកម្មវិធីប្រគំតន្ត្រី «The Rise for Khmer» នៅទីក្រុងប៉ារីស appeared first on .

នៅថ្ងៃទី២៦ ខែតុលា ឆ្នាំ២០២៥ លោកជំទាវអ្នកឧកញ៉ា ម៉ៅ ចំណាន គិតម៉េង បានទៅដល់ទីក្រុងប៉ារីស ប្រទេសបារាំង ហើយបានចុះហត្ថលេខាលើកិច្ចព្រមព្រៀងដ៏មានសារៈសំខាន់មួយ ដើម្បីរៀបចំព្រឹត្តិការណ៍​ដ៏ពិសេសនៅចុងឆ្នាំ២០២៥នេះ។

សមាគមសិល្បករខ្មែរ នៅថ្ងៃទី០១ ខែវិច្ឆិកា ឆ្នាំ២០២៥ បានប្រកាសឱ្យដឹងថា បើកទំព័រប្រវត្តិសាស្ត្រថ្មី៖ តន្ត្រី​កម្ពុជា នៅទីក្រុងប៉ារីស។ សមាគមសិល្បករខ្មែរ មានមោទនភាពក្នុងការប្រកាស​ពីវត្តមានកំពូលតារាចម្រៀង​របស់ផលិតកម្មបារមី ដូចជា វណ្ណដា, វណ្ណថាន, នរិទ្ធ, យ៉ូហៃ និង ស៊ូហ្សាណា សម្រាប់ការប្រគំតន្ត្រីដ៏ធំមួយ នៅសាលប្រគំតន្ត្រីដ៏ល្បីឈ្មោះ Salle Pleyel ទីក្រុងប៉ារីស ប្រទេសបារាំង នៅថ្ងៃទី១ ខែធ្នូ ឆ្នាំ២០២៥។

សូមជម្រាបថា ព្រឹត្តិការណ៍ដ៏អស្ចារ្យនេះកើតឡើងបានក្រោមកិច្ចសហការដ៏មោទនភាពរវាង សមាគមសិល្បករខ្មែរ ផលិតកម្មបារមី និង Sabay Events Production (ប្រទេសបារាំង) ដែលនេះជាលើកដំបូងក្នុងប្រវត្តិសាស្ត្រ ដែលក្រុមសិល្បករខ្មែរជាច្រើននាក់នឹងឡើងសម្តែងនៅលើឆាកតន្ត្រីតែមួយរួមគ្នា ក្នុងសាលប្រគំតន្ត្រីដ៏មាន​កិត្តិយសបំផុតមួយនៅអឺរ៉ុប៕

The post អ្នកឧកញ៉ា ម៉ៅ ចំណាន គិតម៉េង ដឹកនាំរៀបចំព្រឹត្តិការណ៍ពិសេសមួយចុងឆ្នាំ២០២៥ នៅទីក្រុងប៉ារីស ប្រទេសបារាំង appeared first on .

នេះជាលើកទី២ហើយ ដែលលោកជំទាវអ្នកឧកញ៉ា ម៉ៅ ចំណាន គិតម៉េង បានដឹកនាំកិច្ចប្រជុំ ដើម្បីជជែកពិភាក្សា​លម្អិត​លើកវឌ្ឍនភាពផែនការការងារ និងគម្រោងនៃការរៀបចំព្រឹត្តិការណ៍​ដ៏ពិសេស​មួយ នាចុងឆ្នាំ២០២៥ បន្ទាប់​ពីកាលពីរសៀលថ្ងៃទី១៧ ខែតុលា ឆ្នាំ២០២៥ នៅទីស្នាក់សមាគមសិល្បករខ្មែរ បានរៀបចំកិច្ចប្រជុំ​ពិសេស​មួយជាមួយនឹងថ្នាក់ដឹកនាំសមាគម អំពីការរៀបចំព្រឹត្តិការណ៍មួយនេះផងដែរ។

យ៉ាងណាក្តី សមាគម​សិល្បករខ្មែរ ពុំទាន់បានបង្ហាញឱ្យដឹងពីព្រឹត្តិការណ៍ពិសេសចុងឆ្នាំ២០២៥នេះ ឱ្យបាន​ដឹង​ច្បាស់នៅឡើយទេ។ ទោះយ៉ាងណា សមាគមបញ្ជាក់ថា ព័ត៌មានលម្អិតនៃគម្រោងរៀបចំព្រឹត្តិការណ៍​ដ៏ពិសេសនេះ នឹង​ត្រូវលើកយកមកបង្ហាញជាផ្លូវការ នៅក្នុងរយៈពេលដ៏ខ្លីខាងមុខនេះ៕

The post អ្នកឧកញ៉ា ម៉ៅ ចំណាន គិតម៉េង ដឹកនាំកិច្ចប្រជុំស្តីពីវឌ្ឍនភាពការងាររៀបចំព្រឹត្តិការណ៍ដ៏ពិសេសមួយ នៅចុងឆ្នាំ២០២៥ appeared first on .

នៅថ្ងៃទី៦ ខែតុលា ឆ្នាំ២០២៥ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ បានចេញលិខិតថ្លែងអំណរគុណ ជូនចំពោះ អ្នកឧកញ៉ា ហេង ឡុង ដែលបានចូលរួមឧបត្ថម្ភថវិកា ២០,០០០ ដុល្លារ ជូនដល់សមាគម។

សមាគមបានបញ្ជាក់ថា ការចូលរួមចំណែកទ្រទ្រង់របស់អ្នកឧកញ៉ា ហេង ឡុង មិនត្រឹមតែជាការរួមចំណែកដ៏ធំធេងដល់សកម្មភាពសមាគមសិល្បករខ្មែរប៉ុណ្ណោះទេ ប៉ុន្តែនេះការរួមចំណែកប្រកបដោយគុណតម្លៃខ្ពស់ក្នុងការជួយថែរក្សា ការពារ និងអភិវឌ្ឍន៍វិស័យសិល្បៈវប្បធម៌ដ៏ល្អផូរផង់របស់កម្ពុជា។

គួររំឭកថា លោកជំទាវអ្នកឧកញ៉ា ម៉ៅ ចំណាន គិតម៉េង បានជាប់ឆ្នោតជាប្រធានសមាគមសិល្បករខ្មែរ នៅអាណត្តិទី៦ កាលពីថ្ងៃទី០២ ខែឧសភា ឆ្នាំ២០២៤ ដែលត្រូវដឹកនាំសមាគមមួយនេះ ចាប់ពីឆ្នាំ២០២៤ រហូតដល់ឆ្នាំ២០២៩។ បន្ទាប់ពីកាន់តំណែងជាប្រធានសមាគម រយៈពេលជាង ១ឆ្នាំមកនេះ លោកជំទាវអ្នកឧកញ៉ា បានដឹកនាំសមាគមសិល្បករខ្មែរឆ្ពោះទៅរកភាពកាន់តែរីកចម្រើន ដោយបានដើរតួនាទីយ៉ាងសកម្មចូលរួមចំណែកជាមួយរាជរដ្ឋាភិបាល ក៏ដូចជាក្រសួងវប្បធម៌ និងវិចិត្រសិល្បៈក្នុងកិច្ចអភិរក្ស និងអភិវឌ្ឍវិស័យសិល្បៈវប្បធម៌ជាតិ។ ជាពិសេស គឺការគាំពារដល់សិល្បករចាស់ជរា ពិការ បាត់បង់សមត្ថភាព ព្រមទាំងដឹកនាំធ្វើកិច្ចការសម្បុរសធម៌ជាច្រើនទៀត៕

The post អ្នកឧកញ៉ា ហេង ឡុង ឧបត្ថម្ភថវិកា ២០,០០០ដុល្លារ សម្រាប់ទ្រទ្រង់ដល់សមាគមសិល្បករខ្មែរ appeared first on .