នៅថ្ងៃទី១១ ខែមិថុនា ធនាគារកណ្តាលអឺរ៉ុប (ECB) បានប្រកាសបង្កើន ០,២៥% នៃអត្រាការប្រាក់គោលរបស់ខ្លួន ដល់ ២,២៥% ខណៈការសម្រេចចិត្តនេះ ត្រូវបានរំពឹងទុកដោយទីផ្សារ។

ធនាគារកណ្តាលអឺរ៉ុប (ECB) បាននិយាយថា ចលនានេះមានគោលបំណងបន្ធូរបន្ថយសម្ពាធអតិផរណាដែលបណ្តាលមកពីជម្លោះនៅមជ្ឈិមបូព៌ា។ សេចក្តីថ្លែងការណ៍ដដែលនេះ បានសរសេរទៀតថា ៖”ការដំឡើងអត្រាការប្រាក់គឺសមរម្យដោយសារតែសេណារីយ៉ូជាច្រើនទាក់ទងនឹងស្ថានភាពនៅមជ្ឈិមបូព៌ា និងផលប៉ះពាល់នៃការភ័យខ្លាចទៅលើទស្សនវិស័យរយៈពេលមធ្យម សម្រាប់តំបន់ចាយប្រាក់អឺរ៉ូ”។

គួរជម្រាបជូនថា ជម្លោះនៅមជ្ឈិមបូព៌ាមានរយៈពេលជិតបីខែកន្លងមកនេះ បានរំខានដល់លំហូរថាមពលសកល ដោយសារតែការបិទច្រកសមុទ្រ Hormuz និងការវាយប្រហារលើរោងចក្រផលិតថាមពលនៅក្នុងតំបន់។ បទឈប់បាញ់នៅតែមានប្រសិទ្ធភាព ប៉ុន្តែភាពតានតឹងរវាងទីក្រុងវ៉ាស៊ីនតោន និងទីក្រុងតេអេរ៉ង់ បានបន្តកើនឡើងក្នុងរយៈពេលប៉ុន្មានថ្ងៃថ្មីៗនេះ៕​

The post អឺរ៉ុប ដំឡើងអត្រាការប្រាក់ជាលើកដំបូង ក្នុងរយៈពេល ៣ឆ្នាំចុងក្រោយ appeared first on .

ការនាំចេញដែកថែបរបស់សហភាពអឺរ៉ុប ទៅកាន់សហរដ្ឋអាមេរិកបានធ្លាក់ចុះ ៣៤% ចាប់តាំងពីទីក្រុងវ៉ាស៊ីនតោន បានដំឡើងពន្ធដល់ ៥០% លើផលិតផលជាច្រើនប្រភេទ រួមទាំងម៉ាស៊ីនបោកគក់ និងម៉ូតូ ផងដែរ។

ការនាំចេញដែកថែបទៅកាន់សហរដ្ឋអាមេរិក បានធ្លាក់ចុះមកត្រឹម ១,៩៤ លានតោន ក្នុងរយៈពេលបីត្រីមាស ចាប់តាំងពីរដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ បានដំឡើងពន្ធនាំចូលទ្វេដងលើដែកថែប និងអាលុយមីញ៉ូមពី ២៥% ដល់ ៥០% កាលពីមួយឆ្នាំមុន។

គួជម្រាបជូនផងដែរថា ក្រុមហ៊ុនផលិតដែកនៅសហភាពអឺរ៉ុប បាននាំចេញដែកថែបចំនួន ៣,៤ លានតោនទៅកាន់សហរដ្ឋអាមេរិកក្នុងឆ្នាំ២០២៥ បើប្រៀបធៀបទៅនឹង ៤,១ លានតោនក្នុងឆ្នាំ២០២៤ និង ៤,៧ លានតោនក្នុងឆ្នាំ២០១៧។ នេះបើយោងតាមសមាគម Eurofer៕

The post ការនាំចេញដែកថែបរបស់ EU ធ្លាក់ចុះយ៉ាងគំហុក ដោយសារពន្ធគយខ្ពស់របស់លោក ត្រាំ appeared first on .

នៅថ្ងៃទី២៧ ខែឧសភា សភាពាណិជ្ជកម្ម និងឧស្សាហកម្មសហភាពអឺរ៉ុបប្រចាំនៅប្រទេសចិន បានចេញផ្សាយការស្ទង់មតិមួយលើក្រុមហ៊ុនជាសមាជិកជិត ៣០០។ ស្ទើរតែមួយភាគបីនៃសមាជិកទាំងនោះ បានបង្ហាញថា ពួកគេកំពុងបង្កើនផលិតកម្មនៅក្នុងប្រទេសចិន ខណៈ ៣៧% ផ្សេងទៀត បាននិយាយថា ពួកគេមិនបានផ្លាស់ប្តូរយុទ្ធសាស្ត្រខ្សែសង្វាក់ផ្គត់ផ្គង់របស់ខ្លួននោះឡើយ ក្នុងរយៈពេលពីរឆ្នាំកន្លងមកនេះ។

យ៉ាងណាមិញ ចំពោះជាសមាជិក ៦៨% ផ្សេងទៀត បានឆ្លើយតបថា ពួកគេនឹងបន្ត ឬពង្រីកផលិតកម្មនៅក្នុងប្រទេសចិន ខណៈមានតែ ៧% ប៉ុណ្ណោះដែលបាននិយាយថា ពួកគេនឹងផ្លាស់ប្តូររោងចក្ររបស់ខ្លួនទៅប្រទេសមួយផ្សេងទៀត ឬបង្កើតរោងចក្រផលិតនៅកន្លែងផ្សេង។

បច្ចុប្បន្នប្រទេសចិនមានចំនួនប្រហែល ២៨% នៃទិន្នផលទំនិញផលិតទូទាំងពិភពលោក ទោះបីជាមានពន្ធនាំចូលពីសហរដ្ឋអាមេរិក និងសហភាពអឺរ៉ុប (EU) ក៏ដោយ។ សហភាពអឺរ៉ុប ត្រូវបានគេរាយការណ៍ថាកំពុងបង្កើនការត្រួតពិនិត្យរបស់ខ្លួនលើការអនុវត្តពាណិជ្ជកម្មដោយស្មើភាពរបស់ប្រទេសចិន។

គួរជម្រាបជូនផងដែរថា យោងតាមការស្ទង់មតិខាងលើ តម្លៃគឺជាហេតុផលចម្បងមួយដែលក្រុមហ៊ុនអឺរ៉ុប កំពុងបង្កើនផលិតកម្មនៅក្នុងប្រទេសចិន។ ថ្លៃពលកម្មទាបបានជួយប្រទេសនេះឱ្យក្លាយជាមជ្ឈមណ្ឌលផលិតកម្មសកល។ តែទោះជាយ៉ាងណាក៏ដោយ ខណៈពេលដែលរោងចក្រប្រឈមមុខនឹងកង្វះខាតកម្លាំងពលកម្ម អាជីវកម្មជាច្រើនក្នុងប្រទេសនេះ កំពុងបង្កើនល្បឿនស្វ័យប្រវត្តិកម្មយ៉ាងឆាប់រហ័ស៕

The post អឺរ៉ុប កំពុងបង្កើនការពឹងផ្អែកលើរោងចក្រចិនកាន់តែខ្លាំងឡើង ចំពេលរងសម្ពាធពីអាមេរិក appeared first on .

ការវាយតម្លៃនេះត្រូវបានធ្វើឡើងដោយមេដឹកនាំសហភាពអឺរ៉ុប (EU) ក្នុងអំឡុងពេលកិច្ចប្រជុំរបស់រដ្ឋមន្ត្រីហិរញ្ញវត្ថុសហភាពអឺរ៉ុប (Eurogroup) នៅទីក្រុង Lefkosia ប្រទេស Cyprus កាលពីសប្តាហ៍មុន។

នៅដើមឆ្នាំ២០២៦ ប្រេងឆៅប្រភេទ Brent បានចាប់ផ្តើមជួញដូរក្នុងតម្លៃប្រហែល ៦០ដុល្លារក្នុងមួយបារ៉ែល និងទាបជាង ៧៥ដុល្លារក្នុងមួយបារ៉ែលមុនពេលមានជម្លោះជាមួយអ៊ីរ៉ង់។ ប៉ុន្តែបច្ចុប្បន្ន ប្រេងឆៅប្រភេទ Brent និង WTI កំពុងជួញដូរប្រហែល ៩៨ដុល្លារ និង ៩១ដុល្លារក្នុងមួយបារ៉ែលរៀងគ្នា។

ទន្ទឹមនឹងនេះ ឧស្ម័ននៅអឺរ៉ុប ដែលកំពុងជួញដូរនៅលើផ្សារហ៊ុនហូឡង់ TTF បច្ចុប្បន្នមានតម្លៃ ៤៦,៦៨អឺរ៉ូក្នុងមួយមេហ្គាវ៉ាត់ម៉ោង ពោលគឺបានកើនឡើងជិត ៥៧% បើធឿបទៅនឹងរយៈពេលពីបីខែមុន។

យ៉ាងណាមិញ លោក Valdis Dombrovskis ស្នងការសេដ្ឋកិច្ចសហភាពអឺរ៉ុប បានព្យាករថា អតិផរណាសម្រាប់ប្លុកនេះ នៅឆ្នាំនេះនឹងមានកម្រិត ៣,១% ដែលខ្ពស់ជាងការប៉ាន់ស្មានពីមុន ១,៩%។ ចំពោះការហក់ឡើងនេះ ភាគច្រើនត្រូវបានកើតឡើងដោយសារតែការកើនឡើងនៃតម្លៃប្រេង និងឧស្ម័ន ចាប់តាំងពីជម្លោះជាមួយអ៊ីរ៉ង់បានចាប់ផ្តើម។

មិនតែប៉ុណ្ណោះ លោក Dombrovskis ក៏បានសង្កត់ធ្ងន់ទៀតថា អតិផរណារបស់ EU ត្រូវបានគេព្យាករថានឹងឈានដល់ ២,៤% នៅក្នុងឆ្នាំ២០២៧ ដោយសារតែតម្លៃថាមពលកើនឡើងខ្ពស់ជាប់លាប់៕​

The post EU ព្រមានថាតម្លៃប្រេង និងឧស្ម័ននៅអឺរ៉ុបបន្តស្ថិតនៅកម្រិតខ្ពស់ រហូតដល់ចុងឆ្នាំ២០២៧ appeared first on .

ការពង្រីកកិច្ចព្រមព្រៀងដែលមានតាំងពីឆ្នាំ២០០០ នេះ ត្រូវបានធ្វើឡើងនៅចំពេលដែលម៉ិកស៊ិក ខិតខំថែរក្សាកិច្ចព្រមព្រៀងពាណិជ្ជកម្មសេរីបីផ្លូវជាមួយសហរដ្ឋអាមេរិក និងកាណាដា។ សហភាពអឺរ៉ុប គឺជាដៃគូពាណិជ្ជកម្មធំបំផុតទីបីរបស់ម៉ិកស៊ិក ដែលនៅពីក្រោយតែសហរដ្ឋអាមេរិក និងចិនប៉ុណ្ណោះ។

យ៉ាងណាមិញ​ ប្រធានាធិបតីម៉ិកស៊ិក លោកស្រី Claudia Sheinbaum បានសង្កត់ធ្ងន់លើសារៈសំខាន់នៃ “ការបើកជើងមេឃបន្ថែមទៀត” នៅពេលដែលទាំងម៉ិកស៊ិក និងសហភាពអឺរ៉ុប កំពុងតស៊ូជាមួយនឹងពន្ធគយរបស់ប្រធានាធិបតីអាមេរិក លោក ដូណាល់ ត្រាំ។

កិច្ចព្រមព្រៀងពាណិជ្ជកម្មដែលត្រូវបានធ្វើបច្ចុប្បន្នភាពថ្មីនេះ ត្រូវបានចុះហត្ថលេខាដោយលោកស្រី Sheinbaum និងប្រធានគណៈកម្មការអឺរ៉ុប លោកស្រី Ursula von der Leyen ក្នុងអំឡុងពេលកិច្ចប្រជុំកំពូលសហភាពអឺរ៉ុប-ម៉ិកស៊ិកលើកទីប្រាំបី ដែលបានលុបបំបាត់ឧបសគ្គដែលនៅសេសសល់ភាគច្រើន ចំពោះពាណិជ្ជកម្ម និងការវិនិយោគរវាងភាគីទាំងពីរ។

កិច្ចព្រមព្រៀងដែលបានធ្វើបច្ចុប្បន្នភាពនេះ ជួយសម្រួលដល់ពាណិជ្ជកម្មគ្រឿងបន្លាស់រថយន្ត ដែលជាវិស័យមួយដែលរងផលប៉ះពាល់ជាពិសេស ដោយពន្ធគយរបស់លោក ត្រាំ។ ប្រទេសម៉ិកស៊ិក ក៏បានយល់ព្រមទទួលស្គាល់ផលិតផលអាហារ និងភេសជ្ជៈរាប់រយមុខពីតំបន់ជាក់លាក់របស់សហភាពអឺរ៉ុបមួយចំនួនផងដែរ ដូចជាសាច់ជ្រូក Parma និងឈីស Roquefort ជាដើម។

គួរជម្រាបជូនផងដែរថា កិច្ចព្រមព្រៀងនេះនឹងបន្ថយពន្ធលើផលិតផលជាច្រើនទៀត និងផ្តល់សិទ្ធិចូលប្រើប្រាស់ដោយមិនគិតពន្ធចំពោះប៉ាស្តា សូកូឡា ដំឡូងបារាំង ផ្លែប៉េសកំប៉ុង ស៊ុត និងផលិតផលបសុបក្សីមួយចំនួន៕​

The post ម៉ិកស៊ិក និងសហភាពអឺរ៉ុប បន្ថយពន្ធគយគ្នាទៅវិញទៅមក ដើម្បីកាត់បន្ថយការពឹងផ្អែកលើអាមេរិក appeared first on .

ទូរទស្សន៍រដ្ឋអ៊ីរ៉ង់ IRIB បានរាយការណ៍នៅថ្ងៃទី១៧ ខែឧសភាថា បន្ទាប់ពីកប៉ាល់ចិន ជប៉ុន និងប៉ាគីស្ថានបានឆ្លងកាត់ច្រកសមុទ្រ Hormuz ដោយសុវត្ថិភាព ដោយមានការអនុញ្ញាតពីកងទ័ពជើងទឹកអ៊ីរ៉ង់ ប្រទេសអឺរ៉ុបជាច្រើនឥឡូវនេះកំពុងស្វែងរកការយល់ព្រម សម្រាប់កប៉ាល់របស់ពួកគេ ដើម្បីធ្វើដំណើរលើផ្លូវសមុទ្រនេះផងដែរ។

លោក Ebrahim Azizi ប្រធានគណៈកម្មាធិការសន្តិសុខជាតិ និងគោលនយោបាយការបរទេសរបស់សភាអ៊ីរ៉ង់ បាននិយាយនៅថ្ងៃដដែលនោះថា ទីក្រុងតេអេរ៉ង់បានរៀបចំយន្តការសម្រាប់គ្រប់គ្រងចរាចរណ៍នៅក្នុងច្រកសមុទ្រ Hormuz ឡើងវិញ ហើយនឹងប្រកាសវាក្នុងពេលឆាប់ៗនេះ។ ក្រោមយន្តការនេះ មានតែកប៉ាល់មកពីប្រទេសដែលសហការណ៍ជាមួយអ៊ិរ៉ង់ប៉ុណ្ណោះ ដែលនឹងទទួលបានអត្ថប្រយោជន៍។

គួរជម្រាបជូនថា ក្នុងរយៈពេលប៉ុន្មានថ្ងៃថ្មីៗនេះ អ៊ីរ៉ង់ បានអនុញ្ញាតឱ្យនាវារាប់សិបគ្រឿង រួមទាំងនាវាមកពីប្រទេសចិន ឆ្លងកាត់ច្រកសមុទ្រ Hormuz បន្ទាប់ពីប្រទេសជាច្រើនបានឈានដល់កិច្ចព្រមព្រៀងលើពិធីសារសម្រាប់ការគ្រប់គ្រងច្រកសមុទ្ររបស់ខ្លួន​៕​

The post អ៊ីរ៉ង់ កំពុងចរចាបើកឲ្យកប៉ាល់របស់សភាពអឺរ៉ុប ឆ្លងកាត់ច្រកសមុទ្រ Hormuz appeared first on .

លោកស្រី Stella Li អនុប្រធានប្រតិបត្តិរបស់ BYD បាននិយាយក្នុងបទសម្ភាសមួយថា ក្រុមហ៊ុនផលិតរថយន្តអគ្គិសនីធំជាងគេបំផុតរបស់ពិភពលោក កំពុងពិភាក្សាអំពីកិច្ចព្រមព្រៀងដែលអាចកើតមាន ដើម្បីទទួលយករោងចក្រនៅក្នុងប្រទេសក្នុងតំបន់អឺរ៉ុប ដូចជាប្រទេសអ៊ីតាលីជាដើម។

លោកស្រី Li បានសង្កត់ធ្ងន់ថា ក្រុមហ៊ុន BYD ចូលចិត្តដំណើរការរោងចក្រដោយខ្លួនឯង ជាជាងការបណ្តាក់ទុនរួមគ្នាជាមួយក្រុមហ៊ុនដទៃទៀត។

យ៉ាងណាមិញ​ ជុំវិញការលើកឡើងរបស់ថ្នាក់ដឹកនាំជាន់ខ្ពស់ក្រុមហ៊ុនខ្នាតយក្សចិននេះ បានកើតឡើង ចំពេលមានរបាយការណ៍ថា ក្រុមហ៊ុន Stellantis និងក្រុមហ៊ុន Leapmotor របស់ចិន បានប្រកាសពីផែនការចាប់ផ្តើមផលិតរថយន្តរួមគ្នា នៅអឺរ៉ុប។

គួរជម្រាបជូនថា BYD ហាក់កំពុងទទួលបានអត្ថប្រយោជន៍ ពីការចាប់អារម្មណ៍ឡើងវិញលើរថយន្តអគ្គិសនី ចាប់តាំងពីតម្លៃប្រេងឥន្ធនៈបានកើនឡើងខ្ពស់ បន្ទាប់ពីជម្លោះនៅមជ្ឈិមបូព៌ាមក។ ក្រុមហ៊ុននេះបានពង្រីកខ្លួនយ៉ាងខ្លាំងនៅក្រៅប្រទេស ដោយការលក់របស់ខ្លួន បានកើនឡើងយ៉ាងខ្លាំងនៅអឺរ៉ុប បន្ទាប់ពីមានសម្ពាធពីសង្គ្រាមតម្លៃនៅក្នុងប្រទេសចិន៕​

The post BYD កំពុងចរចាជាមួយ Stellantis ជុំវិញការទិញយករោងចក្រផលិតរថយន្តនៅអឺរ៉ុប appeared first on .

ជុំវិញព័ត៌មាននេះត្រូវបានបង្ហាញនៅក្នុងរបាយការណ៍មួយមានឈ្មោះថា “ការបង្កើតសេដ្ឋកិច្ចយានយន្តអគ្គិសនី” ដែលបានចេញផ្សាយ នៅថ្ងៃទី១២ ខែឧសភា ដោយសមាគមពាណិជ្ជកម្មយានយន្តអគ្គិសនីអឺរ៉ុប (E-Mobility Europe) និងក្រុមហ៊ុនស្រាវជ្រាវ New Automotive។

ចំពោះការវិនិយោគដ៏ច្រើនសន្ធឹកសន្ធាប់នេះផងដែរ ត្រូវបានបែងចែក ដោយ ១០៩ពាន់លានអឺរ៉ូទៅលើខ្សែសង្វាក់ផ្គត់ផ្គង់អាគុយ ៦០ពាន់លានអឺរ៉ូលើយានយន្តអគ្គិសនី និងចន្លោះពី ២៣-៤៦ពាន់លានអឺរ៉ូទៅបណ្តាញស្ថានីយ៍សាកថ្ម។

យ៉ាងណាមិញ កិច្ចខិតខំប្រឹងប្រែងនេះ មានគោលបំណងកាត់បន្ថយការពឹងផ្អែកលើប្រទេសចិន ដែលផលិតអាគុយ ៨០% នៃពិភពលោក រួមទាំងអាគុយដែលប្រើក្នុងយានយន្តក្រៅពីយានយន្តអគ្គិសនី ផងដែរ។

គួរឲ្យដឹងថា ឧស្សាហកម្មរថយន្តអគ្គិសនីរបស់សហភាពអឺរ៉ុប កំពុងស្ថិតក្នុងការរៀបចំរចនាសម្ព័ន្ធឡើងវិញ ដោយផ្តោតលើការផ្លាស់ប្តូររោងចក្រផលិតរថយន្តបែបប្រពៃណី និងការសាងសង់រោងចក្រផលិតរថយន្តអគ្គិសនីថ្មី។ ពួកគេក៏កំពុងបង្កើនសមត្ថភាពផលិតថ្ម ដើម្បីកាត់បន្ថយការចំណាយ និងគ្រប់គ្រងហានិភ័យខ្សែសង្វាក់ផ្គត់ផ្គង់ផងដែរ។

យោងតាម E-Mobility Europe ការវិនិយោគទាំងនេះ បានគាំទ្រការងារសរុបជាង ១៥០ ០០០ កន្លែង ហើយវានឹងអាចបង្កើនចំនួននោះទ្វេដង ប្រសិនបើវិនិយោគិនអនុវត្តគម្រោងនេះយ៉ាងពេញលេញ៕​

The post សហភាពអឺរ៉ុប កំពុងវិនិយោគលុយច្រើនមហាសាលជាង ២៣០ពាន់លានដុល្លារ លើអាគុយ និងយានយន្តអគ្គិសនី appeared first on .

កាលពីពេលថ្មីៗនេះ លោក ត្រាំ បានសរសេរនៅលើបណ្តាញសង្គម Truth Social ថា លោកកំពុងរង់ចាំដោយអត់ធ្មត់សម្រាប់សហភាពអឺរ៉ុប ដើម្បិបំពេញផ្នែករបស់ពួកគេ ទៅលើកិច្ចព្រមព្រៀងពាណិជ្ជកម្មជាប្រវត្តិសាស្រ្ត ដែលសម្រេចបានកាលពីខែកក្កដា ឆ្នាំមុន ។

លើសពីនេះ ប្រធានាធិបតីអាមេរិករូបនេះ​ បនសង្កត់ធ្ងន់ទៀតថា ៖” សហភាពអឺរ៉ុប បានប្តេជ្ញាកាត់បន្ថយការនាំចូលរបស់ពួកគេល់សូន្យ។ ខ្ញុំកំពុងទុកពេកឲ្យពួកគេរហូតដល់ថ្ងៃនៃការប្រកាសឯករាជ្យរបស់សហរដ្ឋអាមេរិក បើមិនដូច្នោះទេ ពន្ធនាំចូលនឹងកើនឡើងដល់កម្រិតខ្ពស់ជាងនេះភ្លាមៗ”។

គួរឲ្យដឹងថា ចុងសប្តាហ៍មុន លោក ត្រាំ បានប្រកាសថា លោកនឹងដំឡើងពន្ធនាំចូលលើរថយន្តពីសហភាពអឺរ៉ុប ពី ១៥% ទៅ ២៥% ដោយសារតែការមិនអនុលោមតាមកិច្ចព្រមព្រៀងពាណិជ្ជកម្មរបស់ប្លុកនេះ។ ក្រោមកិច្ចព្រមព្រៀងនេះ សហភាពអឺរ៉ុប ត្រូវបានតម្រូវឱ្យកាត់បន្ថយពន្ធលើទំនិញឧស្សាហកម្មរបស់សហរដ្ឋអាមេរិកមកត្រឹម ០% និងដាក់កូតាមិនគិតពន្ធលើផលិតផលកសិកម្ម និងអាហារសមុទ្រមួយចំនួនរបស់សហរដ្ឋអាមេរិក។

ប៉ុន្តែទោះជាយ៉ាងណាក៏ដោយ វឌ្ឍនភាពក្នុងការអនុម័តច្បាប់ ដើម្បីអនុវត្តកិច្ចព្រមព្រៀងនេះ នៅក្នុងសភាអឺរ៉ុប ហាក់មានភាពយឺតយ៉ាវខ្លាំង ចំពែលប្រធានគណៈកម្មការអឺរ៉ុប លោកស្រី Ursula von der Leyen បានលើកឡើងថា លោកស្រីមានកិច្ចពិភាក្សាជាមួយលោក ត្រាំ បន្ថែម ជុំវិញបញ្ហាទាំងនេះ៕​

The post លោក ត្រាំ ដាក់ថ្ងៃផុតកំណត់សម្រាប់សហភាពអឺរ៉ុប ដើម្បីអនុវត្តកិច្ចព្រមព្រៀងពាណិជ្ជកម្ម appeared first on .

លោក ត្រាំ បានសរសេរនៅលើបណ្តាញសង្គម Truth Social របស់ខ្លួនថា ដោយផ្នែកលើការពិតដែលថាសភាពអឺរ៉ុបបច្ចុប្បន្នមិនបានគោរពតាមកិច្ចព្រមព្រៀងពាណិជ្ជកម្ម សហដ្ឋអាមេរិក នឹងដំឡើងពន្ធនាំចូលលើរថយន្តទូទៅ និងរថយន្តដឹកទំនិញរបស់ពួកគេ ដែលនាំចូលមកកាន់ទឹកដីអាមេរិក។

ប៉ុន្តែទោះជាយ៉ាងណាក៏ដោយ ប្រធានាធិបតីអាមេរិករូបនេះ ក៏បានអះអាងទៀតផងដែរថា ប្រសិនបើសហភាពអឺរ៉ុប ផលិតរថយន្តទូទៅ និងរថយន្តដឹកទំនិញនៅក្នងរោងចក្រនៅសហរដ្ឋអាមេរិក នោះពួកគេមិនចាំបាច់ត្រូវបង់ពន្ធនាំចូលអ្វីនោះឡើយ។

យ៉ាងណាមិញ លោក ត្រាំ ហាក់មិនបានបញ្ជាក់ថាការដំឡើងពន្ធលើសហភាពអឺរ៉ុបនេះ ផ្អែកលើច្បាប់ណាមួយនោះទេ ដោយកាលពីខែកុម្ភៈ តុលាការកំពូលអាមេរិក បានបដិសេធពន្ធនាំចូលដែលលោកបានដាក់ ដោយផ្អែកលើច្បាប់អំណាចសេដ្ឋកិច្ចបន្ទាន់អន្តរជាតិ (IEEPA)។ ច្បាប់នេះបានជំរុញឱ្យលោក ត្រាំ ឆ្លើយតបវិញដោយដាក់ពន្ធជំនួសថ្មីក្នុងអត្រា ១០% ហើយវាត្រូវបានចូលជាធរមាននៅចុងខែកុម្ភៈកន្លងទៅ។

គួរជម្រាបជូនថា សេចក្តីថ្លែងការណ៍នេះបានកើតឡើងត្រឹមតែមួយថ្ងៃប៉ុណ្ណោះបន្ទាប់ពីលោក ត្រាំ បានបន្តរិះគន់លើអធិការបតីអាល្លឺម៉ង់ លោក Friedrich Merz។ ប្រធានាធិបតីអាមេរិករូបនេះ បានអះអាងថា លោក Merz គួរតែផ្តោតលើការដោះស្រាយបញ្ហាក្នុងស្រុក និងបញ្ចប់ជម្លោះរុស្ស៊ី-អ៊ុយក្រែន ជាជាងការចូលមកជ្រៀតជ្រែកនៅក្នុងបញ្ហាអ៊ីរ៉ង់ដែរនោះ៕​

The post លោក ត្រាំ ប្រកាសដំឡើងពន្ធនាំចូលលើរថយន្តរបស់អឺរ៉ុបដល់ ២៥% appeared first on .