យោងតាមការស្រាវជ្រាវដោយផ្អែកលើទិន្នន័យពីការិយាល័យស្ថិតិកណ្តាល ដែលបានបោះពុម្ពផ្សាយដោយសាកលវិទ្យាល័យ Tel Aviv កាលពីដើមខែសីហា បង្ហាញថា ការធ្វើចំណាកស្រុកកំពុងកើនឡើងយ៉ាងខ្លាំង ដោយមានមនុស្សជាង ៨៦ ៥០០ នាក់ បានចាកចេញពីប្រទេសនៅឆ្នាំ២០២៣ ប្រហែល ៩១ ៥០០ នាក់នៅឆ្នាំ២០២៤ និងចំនួនស្រដៀងគ្នានេះផងដែរ នៅក្នុងឆ្នាំ២០២៥។

យ៉ាងណាមិញ​ សម្រាប់ការប្រៀបធៀប ក្នុងអំឡុងពេលដូចគ្នានៃឆ្នាំ២០១៣, ២០១៤ និង២០១៥ មានតែពលរដ្ឋត្រឹមតែ ៨៣ ២១៩ នាក់ប៉ុណ្ណោះដែលបានចាកចេញពីអ៊ីស្រាអែល។ របាយការណ៍ពីអាជ្ញាធរពន្ធដារអ៊ីស្រាអែល ក៏បានបង្ហាញឲ្យដឹងផងដែរថា អ្នកដែលបានចាកចេញទាំងនេះ សុទ្ធសឹងតែក្រុមហ៊ុនពលរដ្ឋដែលបង់ពន្ធខ្ពស់។

លោក Gilad Kariv ប្រធានគណៈកម្មាធិការអន្តោប្រវេសន៍ សមាហរណកម្ម និងសហគមន៍ជ្វីហ្វនៅបរទេសរបស់ស្ថាប័ន Knesset អ៊ីស្រាអែល បាននិយាយថា ប្រទេសនេះកំពុងប្រឈមមុខនឹងរលកនៃការធ្វើចំណាកស្រុកទ្រង់ទ្រាយធំបំផុត ដែលរដ្ឋាភិបាលមិនបានធ្វើអ្វីទាល់តែសោះដើម្បីដោះស្រាy។ ហើយមូលហេតុចម្បងនៃស្ថានភាពនេះកើតចេញពីការដួលរលំនៃទំនុកចិត្តនយោបាយ និងវដ្តនៃជម្លោះដ៏យូរអង្វែង។

គួរជម្រាបជូនថា ការចាកចេញបានបន្តកាន់តែខ្លាំងឡើង មុនពេលមានការបោះឆ្នោតដ៏សំខាន់នៅចុងឆ្នាំនេះ ខណៈពេលដែលរដ្ឋាភិបាលរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ កាន់តែមានទំនោរទៅរកស្តាំនិយម និងរឹងរូស៕​

The post អ៊ីស្រាអែល កំពុងជួបវិបត្តិធំ ក្រោយឥស្សរជន និងអ្នកមានៗ សម្រុកចាកចេញពីប្រទេស appeared first on .

យោងតាមការសិក្សាស្រាវជ្រាវដោយផ្នែកផែនការ និងសេដ្ឋកិច្ចរបស់អាជ្ញាធរពន្ធដារអ៊ីស្រាអែល ដែលបានពិនិត្យមើលលើប្រាក់ចំណូលរបស់ជនអន្តោប្រវេសន៍អ៊ីស្រាអែល ក្នុងរយៈពេលមួយទសវត្សកន្លងមកនេះ បានរកឃើញថាអត្រាដែលជនជាតិអ៊ីស្រាអែលដែលមានទ្រព្យសម្បត្តិច្រើន ចាកចេញពីប្រទេសបានកើនឡើងយ៉ាងខ្លាំងនៅចន្លោះឆ្នាំ២០២៣ និង ២០២៤ ដល់កម្រិតខ្ពស់បំផុត ហើយស្ទើរតែទ្វេដងនៃចំនួននៅឆ្នាំ២០១៩។

យ៉ាងណាមិញ ជុំវិញការផ្លាស់ប្តូរនេះកំពុងធ្វើឱ្យរដ្ឋខាតបង់ចំណូលពីពន្ធប្រមាណ ១,២ពាន់លានសេកែល (៤០០លានដុល្លារ) ជារៀងរាល់ឆ្នាំ ជាតួលេខដែលអ្នកស្រាវជ្រាវព្រមានថាអាចកើនឡើងជិតបីដងក្នុងរយៈពេលប្រាំឆ្នាំខាងមុខ។

ការខាតបង់ពន្ធប្រចាំឆ្នាំពីអ្នករកចំណូលខ្ពស់ដែលបានចាកចេញពីប្រទេស បានកើនឡើងពីប្រហែល ៥០០លានសេកែល (១៦៦លានដុល្លារ) មុនឆ្នាំ២០១៩ ដល់ប្រហែល ១,២ពាន់លានសេកែល (៤០០លានដុល្លារ) ក្នុងឆ្នាំ២០២៣ និង ២០២៤។ ហើយប្រសិនបើនិន្នាការនេះនៅតែបន្ត អ្នកស្រាវជ្រាវប៉ាន់ប្រមាណថាការខាតបង់ប្រចាំឆ្នាំអាចឡើងដល់ ៣,៥ពាន់លានសេកែល (១,១៦ពាន់លានដុល្លារ) ក្នុងរយៈពេលប្រាំឆ្នាំខាងមុខ។

គួរឲ្យដឹងថាការសិក្សារបស់អាជ្ញាធរពន្ធដារ បានកើតឡើងបន្ទាប់ពីរបាយការណ៍របស់សាកលវិទ្យាល័យ Tel Aviv ដែលបានចេញផ្សាយកាលពីដើមសប្តាហ៍មុន ដែលបង្ហាញពីនិន្នាការនៃការធ្វើចំណាកស្រុកពីអ៊ីស្រាអែលដែលបានបន្តនៅឆ្នាំ២០២៥ ដោយមានជនជាតិអ៊ីស្រាអែលជិត ៥០ ០០០ នាក់បានចាកចេញពីប្រទេសនេះនៅឆ្នាំទីបីជាប់ៗគ្នា។

ជម្រាបជូនថា តាមប្រវត្តិសាស្ត្រ ការធ្វើចំណាកស្រុករបស់ពលរដ្ឋអ៊ីស្រាអែលភាគច្រើនត្រូវបានបង្កើតឡើងជុំវិញការស្វែងរកឱកាសសេដ្ឋកិច្ចកាន់តែប្រសើរនៅបរទេស។ របាយការណ៍របស់សាកលវិទ្យាល័យ Tel Aviv បានសន្មតថាជម្លោះយោធាដ៏យូរអង្វែងរបស់អ៊ីស្រាអែល និងភាពតានតឹងនយោបាយបានជំរុញឱ្យមានការធ្វើចំណាកស្រុកកើនឡើង ដែលអាចគំរាមកំហែងដល់ផលប្រយោជន៍យុទ្ធសាស្ត្ររយៈពេលវែងរបស់ប្រទេស៕​

The post ពលរដ្ឋអ៊ីស្រាអែលមានទ្រព្យសម្បត្តិច្រើន កំពុងចេញពីប្រទេសច្រើនឡើងៗ ដែលធ្វើឲ្យរដ្ឋខាតលុយពន្ធអស់រាប់រយលានដុល្លារ appeared first on .

លោក Netanyahu បាននិយាយនៅថ្ងៃទី៩ ខែសីហាថា អ៊ីស្រាអែលបដិសេធឯកសារនេះ ដោយសំដៅទៅលើផែនការដែលក្រុមហាម៉ាសប៉ាឡេស្ទីន បានប្រកាសគាំទ្រនៅចុងខែកក្កដា។ លោកបានសង្កត់ធ្នង់ទៀតថាកម្លាំងការពារអ៊ីស្រាអែល (IDF) នឹងមិនដកថយទេ រហូតដល់ក្រុមហាម៉ាសរំសាយអាវុធទាំងស្រុង ហើយនឹងបន្តទប់ស្កាត់ការគំរាមកំហែងនានាប្រឆាំងនឹងទាហាន និងពលរដ្ឋអ៊ីស្រាអែល។

គួរឲ្យដឹងថា ប្រធានាធិបតីអាមេរិក លោក ត្រាំ ធ្លាប់បានសរសើរកិច្ចព្រមព្រៀងហ្គាហ្សាថាជាព្រឹត្តិការណ៍សំខាន់មួយសម្រាប់សន្តិភាពនាពេលអនាគត។ ហើយជាមួយគ្នានោះ លោក Netanyahu បានហៅលោក ត្រាំ ថាជាមិត្តដ៏អស្ចារ្យបំផុត ប៉ុន្តែលោកអ៊ីស្រាអែលកំពុងបង្ហាញការជំទាស់របស់ខ្លួនចំពោះកិច្ចព្រមព្រៀងទាំងនេះ។ ប្រធានាធិបតីអ៊ីស្រាអែលបាននិយាយទៀតថា ៖”ពួកគេមានគំនិតជាច្រើន។ ដែលខ្លះយើងអាចទទួលបាន ប៉ុន្តែខ្លះទៀតយើងមិនអាចទទួលយកទេ។ យើងដឹងពីរបៀបឈរជើងរបស់យើងលើបញ្ហាទាំងនេះ”។

ជម្រាបជូនផងដែរថា យោងតាមផែនការដែលបានប្រកាសនៅចុងខែកក្កដា ក្រុមប្រដាប់អាវុធហាម៉ាសនឹងដកហូតអាវុធនៅដំណាក់កាលទីពីរ ខណៈពេលដែលកងទ័ពអ៊ីស្រាអែលនឹងដកខ្លួនចេញពីហ្គាហ្សាបន្តិចម្តងៗ។ ក្រុមអ្នកបច្ចេកទេសប៉ាឡេស្ទីនមួយក្រុម ដែលហៅថាគណៈកម្មាធិការជាតិសម្រាប់រដ្ឋបាលហ្គាហ្សា (NCAG) នឹងទទួលបន្ទុកប្រតិបត្តិការប្រចាំថ្ងៃក្នុងអំឡុងពេលអន្តរកាលក្រោយជម្លោះ។ ប៉ុន្តែលោក Netanyahu បានជំទាស់ជាសាធារណៈចំពោះកិច្ចព្រមព្រៀងនេះ៕​

The post នាយករដ្ឋមន្ត្រីអ៊ីស្រាអែល ទាត់ចោលផែនការសន្តិភាពរបស់លោក ត្រាំ សម្រាប់តំបន់ហ្គាហ្សា appeared first on .

លោក Yossi Karadi អគ្គនាយកនៃនាយកដ្ឋានព័ត៌មានវិទ្យាជាតិអ៊ីស្រាអែលបានប្រាប់កាសែតអាល្លឺម៉ង់ Die Welt ថា ក្នុងខែមិថុនា ឆ្នាំ២០២៥ ក្នុងអំឡុងពេលប្រតិបត្តិការយោធាអ៊ីស្រាអែលប្រឆាំងនឹងអ៊ីរ៉ង់ អាជ្ញាធរអ៊ីស្រាអែលបានកត់ត្រាការវាយប្រហារតាមអ៊ីនធឺណិតដែលមានចំនួនប្រហែល ១ ៦០០ ករណី។

ប៉ុន្តែនៅក្នុងអំឡុងខែដដែលក្នុងឆ្នាំ២០២៦ ចំនួននេះបានកើនឡើងដល់ប្រហែល ៤ ៨០០ ករណី។ នេះបើតាមការបន្ថែមរបស់លោក Yossi Karadi ។

លោក Karadi បាននិយាយទៀតថា ការវាយប្រហារទាំងនេះត្រូវបានធ្វើឡើងប្រឆាំងទៅនឹងប្រព័ន្ធដែលប្រើប្រាស់ដោយហេដ្ឋារចនាសម្ព័ន្ធសំខាន់ៗរបស់អ៊ីស្រាអែល រួមទាំងអង្គការកណ្តាល ក្រុមហ៊ុនខ្នាតតូច និងមធ្យម រួមទាំងឧបករណ៍ប្រើប្រាស់របស់សាធារណជន ផងដែរ។

ទោះជាយ៉ាងណាក៏ដោយ ជុំវិញការចោទប្រកាន់ទាំងនេះ ខាងអ៊ីរ៉ង់ជារឿយៗ បានចេញមុខបដិសេធថាមិនមានការលួចចូលប្រព័ន្ធកុំព្យូទ័រប្រឆាំងទៅនឹងប្រទេសដដៃទៀតនោះឡើយ ស្របពេលពួកបានអះអាងទៀតថា ប្រទេសខ្លួនក៏ទទួលរងការវាយប្រហារស្រដៀងគ្នានេះផងដែរ៕​

The post ការវាយប្រហារតាមអ៊ីនធឺណិតរបស់អ៊ីរ៉ង់ លើអ៊ីស្រាអែល កើនឡើងខ្លាំងនៅឆ្នាំ២០២៦ នេះ appeared first on .

លោក Netanyahu បានមានប្រសាសន៍នៅក្នុងសន្និសីទសារព័ត៌មានមួយ នៅល្ងាចថ្ងៃទី១៥ ខែមិថុនាថា ៖”លោក ត្រាំ និងខ្ញុំមិនដែលតែងតែមើលមុខគ្នាចំរហូតនោះទេ។ គាត់ជាប្រធានាធិបតីសហរដ្ឋអាមេរិក ហើយខ្ញុំជានាយករដ្ឋមន្ត្រីអ៊ីស្រាអែល។ ខ្ញុំទទួលខុសត្រូវចំពោះផលប្រយោជន៍សន្តិសុខរបស់អ៊ីស្រាអែល ហើយត្រូវធ្វើវាដោយឈ្លាសវៃ”។

ទន្ទឹមនឹងនេះ នៅពេលត្រូវបានសួរនាំថា តើកិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ផ្ទុយនឹងជំហររបស់លោកដែរឬអត់ នាយករដ្ឋមន្ត្រីអ៊ីស្រាអែលរូបនេះ មិនបានឆ្លើយដោយផ្ទាល់ទេ ប៉ុន្តែបានសង្កត់ធ្ងន់លើទំនាក់ទំនងយូរអង្វែងរបស់លោក ជាមួយប្រធានាធិបតី ត្រាំ ទៅវិញ។

មិនតែប៉ុណ្ណោះ លោក Netanyahu ក៏បានចៀសវាងការលើកឡើងដោយផ្ទាល់អំពីកិច្ចព្រមព្រៀងសន្តិភាពរវាងសហរដ្ឋអាមេរិក និងអ៊ីរ៉ង់ ដោយផ្តោតជំនួសវិញលើអ្វីដែលលោកបានពិពណ៌នាថាជា សមិទ្ធផលដ៏អស្ចារ្យពីយុទ្ធនាការរបស់អ៊ីស្រាអែលប្រឆាំងនឹងអ៊ីរ៉ង់។

លោកថែមទាំងបានមានប្រសាសន៍ទៀតថា ៖”ទោះបីជាមានកិច្ចព្រមព្រៀងឬអត់ក៏ដោយ អ៊ីរ៉ង់នឹងមិនមានអាវុធនុយក្លេអ៊ែរទេ ទាំងក្នុងពេលឥឡូវនេះ ឬនាពេលអនាគត។ ដរាបណាខ្ញុំជានាយករដ្ឋមន្ត្រីអ៊ីស្រាអែល រឿងនោះនឹងមិនកើតឡើងទេ”។

មេដឹកនាំរូបនេះ ក៏បានបញ្ជាក់ថាការតស៊ូនៅមិនទាន់ចប់ទេ ដោយបន្ថែមថាប្រទេសរបស់ខ្លួននៅតែត្រូវប្រុងប្រយ័ត្ន រឹងមាំ និងប្តេជ្ញាការពារខ្លួនឯង នៅពេលចាំបាច់។

គួរជម្រាបជូនផងដែរថា លោក ត្រាំ​ ពីមុនធ្លាប់បានរិះគន់នាយករដ្ឋមន្ត្រី លោក Netanyahu ចំពោះការវាយប្រហារនៅថ្ងៃទី១៤ ខែមិថុនា ទៅលើទីក្រុងបេរូត ប្រទេសលីបង់ ដោយអះអាងថាវាបានធ្វើឱ្យកិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ជាប់គាំងអស់រយៈពេលជាច្រើនម៉ោង។ មេដឹកនាំអាមេរិករូបនេះ បានសម្តែងការខឹងសម្បារយ៉ាងខ្លាំងចំពោះរឿងនេះ ហើយបាននិយាយថា នាយករដ្ឋមន្ត្រីអ៊ីស្រាអែលមិនដឹងពីរបៀបវាយតម្លៃស្ថានភាពនោះទេ៕​

The post នាយករដ្ឋមន្ត្រីអ៊ីស្រាអែល សារភាពថាមានភាពល្អក់កករជាមួយលោក ត្រាំ ក្រោយមានកិច្ចព្រមព្រៀងសន្តិភាពនៅអ៊ីរ៉ង់ appeared first on .

នៅក្នុងបទសម្ភាសមួយនៅលើកម្មវិធីផតខាស Pod Force One ដែលបានចាក់ផ្សាយនៅថ្ងៃទី៣ ខែមិថុនា លោក ត្រាំ ត្រូវបានគេសួរនាំអំពីការសន្ទនាតាមទូរស័ព្ទរបស់លោកជាមួយនាយករដ្ឋមន្ត្រីអ៊ីស្រាអែល Netanyahu កាលពីពីរថ្ងៃមុន។

លោក ត្រាំ បានសារភាពទៀតថា លោកបានធ្លោយជេរប្រមាថទៅលើលោក Netanyahu ដោយនិយាយថាគាត់ជាមនុស្សឆ្កួត ដោយសារតែលោកមានអារម្មណ៍ខឹងខ្លាំងពេក បន្ទាប់ពីមេដឹកនាំអ៊ីស្រាអែលរូបនេះ នៅតែបន្តបើកវាយប្រហារលើលីបង់ ដែលបង្កឲ្យមានការរាំងស្ទះដល់ដំណើរការចរចាជាមួយអ៊ីរ៉ង់។

ប៉ុន្តែទោះជាយ៉ាងណាក៏ដោយ ប្រធានាធិបតីអាមេរិករូបនេះ ក៏បានទទូចផងដែរថា លោក និងនាយករដ្ឋមន្ត្រីអ៊ីស្រាអែល នៅតែរក្សាទំនាក់ទំនងល្អជាមួយគ្នា និងបន្តការធ្វើការជាមួយគ្នាបានយ៉ាងល្អដដែល។

គួរជម្រាបជូនផងដែរថា ទីក្រុងតេអេរ៉ង់បាននិយាយម្តងហើយម្តងទៀតថា កិច្ចព្រមព្រៀងឈប់បាញ់ និងបញ្ចប់ជម្លោះណាមួយត្រូវតែរួមបញ្ចូលប្រទេសលីបង់។ អ៊ីរ៉ង់ត្រូវបានគេជឿថាបានផ្អាកការចរចាសន្តិភាពជាមួយសហរដ្ឋអាមេរិក ដោយសារតែការវាយប្រហាររបស់អ៊ីស្រាអែលលើក្រុមហេសបូឡា នៅក្នុងប្រទេសលីបង់៕

The post លោក ត្រាំ សារភាពថាបានប្រើពាក្យជេរប្រមាថទៅលើនាយករដ្ឋមន្ត្រីអ៊ីស្រាអែល appeared first on .

លោក ត្រាំ បានសរសេរលើបណ្តាញសង្គម Truth Social របស់ខ្លួន នៅថ្ងៃទី១ ខែមិថុនាថា៖” ខ្ញុំបានទូរស័ព្ទជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu។ គ្មានកងកម្លាំងយោធាណាមួយនឹងត្រូវបានបញ្ជូនទៅទីក្រុងបេរូតទៀតនោះទេ។ ទាហានទាំងអស់ដែលកំពុងធ្វើដំណើរដកថយ”។

មិនតែប៉ុណ្ណោះ ប្រធានាធិបតីអាមេរិករូបនេះ បានបន្ថែមទៀតថា លោកក៏បាននិយាយជាមួយក្រុម Hezbollah ផងដែរ ដោយបញ្ជាក់ថាក្រុមប្រដាប់អាវុធលីបង់បានយល់ព្រមបញ្ចប់ការប្រយុទ្ធនេះដូចគ្នា។ លោក ត្រាំ និយាយថា ក្រុមនេះនឹងមិនបើកការវាយប្រហារនោះទេ ប្រសិនបើអ៊ីស្រាអែលមិនបើការវាយប្រហារដូចគ្នានោះ។

គួរឲ្យដឹងផងដែរថា លោក ត្រាំ បានរក្សាជំហររបស់លោក ដោយអះអាងថា មេដឹកនាំអ៊ីស្រាអែលបានបង្វែរទិសដៅយោធាត្រលប់ក្រោយ ហើយបានបោះបង់ចោលផែនការសម្រាប់ការវាយប្រហារដ៏សំខាន់មួយលើទីក្រុងបេរូត និងថែមទាំងបានបញ្ជាក់ជាថ្មីនូវការអះអាងរបស់លោកថា ក្រុម Hezbollah និងអ៊ីស្រាអែលបានយល់ព្រមលើបទឈប់បាញ់ជាមួយគ្នាហើយ។

យ៉ាងណាមិញ អ៊ីរ៉ង់ធ្លាប់បានបញ្ជាក់យ៉ាងច្បាស់ថា បទឈប់បាញ់នៅលីបង់ នៅតែជាលក្ខខណ្ឌសំខាន់សម្រាប់កិច្ចព្រមព្រៀងណាមួយជាមួយសហរដ្ឋអាមេរិក ដោយព្រមានថាខ្លួននឹងមិនចុះហត្ថលេខាលើកិច្ចព្រមព្រៀងដាច់ខាត បើនៅតែមានការវាយប្រហាររបស់អ៊ីស្រាអែល លើលីបង់ទៀតនោះ៕​

The post លោក ត្រាំ និយាយថាអ៊ីស្រាអែល និងក្រុម Hezbollah យល់ព្រមលើបទឈប់បាញ់ហើយ appeared first on .

លោក ត្រាំ បានិយាយប្រាប់ទៅអ្នកយកព័ត៌មានកាលពីពេលថ្មីៗនេះថា ៖” ប្រហែលជាចប់ពីការងារនៅទីនេះ ខ្ញុំនឹងទៅអ៊ីស្រាអែល ហើយឈរឈ្មោះជានាយករដ្ឋមន្ត្រី។ យោងតាមលទ្ធផលស្ទង់មតិនៅព្រឹកនេះ ខ្ញុំមានការគាំទ្ររហូតដល់ ៩៩% ទៅហើយ។ វាពិតជាអស្ចារ្យណាស់”។

យ៉ាងណាក៏ដោយ វាមិនទាន់ត្រូវបានគេដឹងច្បាស់នោះទេថា តើការស្ទង់មតិមួយណាដែលលោក ត្រាំ កំពុងសំដៅលើ ខណៈពេលដែលសេតវិមាន ក៏មិនទាន់ឆ្លើយតបទៅនឹងព័ត៌មាននេះផងដែរ។

គួរឲ្យដឹងថា លោក Benjamin Netanyahu បច្ចុប្បន្នជានាយករដ្ឋមន្ត្រីអ៊ីស្រាអែល ហើយបានកាន់តំណែងនេះអស់រយៈពេលជាច្រើនអាណត្តិមកហើយ ចាប់តាំងពីឆ្នាំ១៩៩៦។ លោក Netanyahu ក៏ទទួលបានការគាំទ្រយ៉ាងខ្លាំងពីលោក ត្រាំ ផងដែរ ដោយសារសហរដ្ឋអាមេរិក និងអ៊ីស្រាអែល មានសម្ព័ន្ធភាពយ៉ាងស៊ីជម្រៅក្នុងយុទ្ធនាការប្រឆាំងនឹងអ៊ីរ៉ង់។

សូមជម្រាបជូនផងដែរថា យោងតាមច្បាប់អ៊ីស្រាអែលបានចែងថា បេក្ខជននាយករដ្ឋមន្ត្រីត្រូវតែជាពលរដ្ឋរស់នៅក្នុងប្រទេស និងជាសមាជិកសភា។ សមាជិកសភាដែលកាន់លិខិតឆ្លងដែនបរទេសត្រូវតែលះបង់សញ្ជាតិបរទេសរបស់ពួកគេមុនពេលត្រូវបានអនុញ្ញាតឱ្យស្បថចូលកាន់តំណែង៕​

The post លោក ត្រាំ​ និយាយលេងសើចថាចង់ឈរឈ្មោះធ្វើជានាយករដ្ឋមន្ត្រីថ្មីរបស់អ៊ីស្រាអែល appeared first on .

លោក Netanyahu បាននិយាយថា លោកបានទទួលការវះកាត់ដោយជោគជ័យ ដើម្បីព្យាបាលជំងឺមហារីកក្រពេញប្រូស្តាត កាលពីមួយឆ្នាំកន្លះមុន។ ក្នុងអំឡុងពេលពិនិត្យសុខភាពចុងក្រោយ លោកគ្រូពេទ្យបានរកឃើញដុំពកតូចមួយដែលមានទំហំតិចជាង ១ សង់ទីម៉ែត្រនៅក្នុងក្រពេញប្រូស្តាតរបស់លោក។

នាយករដ្ឋមន្ត្រីអ៊ីស្រាអែលរូបនេះ បាននិយាយទៀតថា វាជាដុំសាចកាច នៅដំណាក់កាលដំបូងប៉ុន្តែមិនរងផលប៉ះពាល់ទាំងស្រុង និងមិនរីករាលដាលនោះឡើយ ដោយលោកទទយលបានការព្យាបាលយ៉ាងយកចិត្តទុកដាក់ ដើម្បីលុបបំបាត់បញ្ហា ហើយឥឡូវនេះមិនបង្ហាញសញ្ញានៃជំងឺនេះទេ។

ជំងឺមហារីកក្រពេញប្រូស្តាត គឺជាជំងឺកាចសាហាវ កើតឡើងទូទៅចំពោះបុរស ជាពិសេសអ្នកដែលមានអាយុលើសពី ៥០ឆ្នាំ។ ប៉ុន្តែប្រសិនបើត្រូវបានរកឃើញទាន់ពេលវេលា វាអាចត្រូវបានព្យាបាលប្រកបដោយប្រសិទ្ធភាពជាមួយនឹងការវះកាត់អង់ដូស្កុប ការវះកាត់ដោយមនុស្សយន្ត និងការព្យាបាលដោយអរម៉ូន។

ជម្រាបជូនថា អតីតប្រធានាធិបតីអាមេរិក លោក ចូ បៃដិន ក៏ត្រូវបានគេធ្វើរោគវិនិច្ឆ័យថាមានជំងឺមហារីកក្រពេញប្រូស្តាតនៅក្នុងខែឧសភា ឆ្នាំ២០២៥ ដែលបានរាលដាលដល់ឆ្អឹងរបស់លោក។ ក្រោយមកលោកបានបញ្ជាក់ថា លោកបានសម្រេចចិត្តលើផែនការព្យាបាល ហើយសង្ឃឹមថានឹងយកឈ្នះជំងឺមហារីកនេះ៕​

The post នាយករដ្ឋមន្ត្រីអ៊ីស្រាអែល Benjamin Netanyahu បង្ហើបថា លោកធ្លាប់មានជំងឺមហារីក appeared first on .

លោក ត្រាំ បានប្រកាសនៅលើវេទិកាប្រព័ន្ធផ្សព្វផ្សាយសង្គម Truth Social របស់ខ្លួនថា ៖“ខ្ញុំទើបតែមានការពិភាក្សាវិជ្ជមានយ៉ាងខ្លាំងជាមួយប្រធានាធិបតីលីបង់ លោក Joseph Aoun និងនាយករដ្ឋមន្ត្រីអ៊ីស្រាអែល Netanyahu។ មេដឹកនាំទាំងពីរបានឯកភាពគ្នាថា ដើម្បីសម្រេចបានសន្តិភាពរវាងប្រទេសទាំងពីរ ពួកគេនឹងចាប់ផ្តើមបទឈប់បាញ់រយៈពេល ១០ថ្ងៃ នៅម៉ោង ៥ល្ងាចថ្ងៃនេះ (ម៉ោង ៥ព្រឹក ថ្ងៃទី១៧ ខែមេសា ម៉ោងនៅភ្នំពេញ)”។

យ៉ាងណាក៏ដោយ ជុំវិញបទឈប់បាញ់នេះ​ លោក ត្រាំ​ ហាក់មិនបានលើកឡើងអំពីក្រុមប្រដាប់អាវុធ Hezbollah នៅលីបង់ទេ ដោយបន្ថែមថា លោកបានអញ្ជើញនាយករដ្ឋមន្ត្រីអ៊ីស្រាអែល និងប្រធានាធិបតីលីបង់ មកកាន់សេតវិមានសម្រាប់ការចរចាសន្តិភាពរយៈពេលវែង។

ទន្ទឹមនឹងនេះ​ នាយករដ្ឋមន្ត្រីលីបង់ លោក Nawaf Salam បានបង្ហាញការស្វាគមន៍យ៉ាងខ្លាំងចំពោះបទឈប់បាញ់ និងបានថ្លែងអំណរគុណដល់ប្រទេសដែលបានជួយសម្របសម្រួលដល់កិច្ចព្រមព្រៀងនេះ រួមទាំងសហរដ្ឋអាមេរិក បារាំង អារ៉ាប៊ីសាអូឌីត អេហ្ស៊ីប កាតា និងហ្សកដានីផងដែរ។

ជម្រាបជូនផងដែរថា កន្លងមកប្រទេសប៉ាគីស្ថាន ធ្លាប់បានបញ្ជាក់ថា សន្តិភាពនៅក្នុងប្រទេសលីបង់គឺជាលក្ខខណ្ឌសំខាន់សម្រាប់ការចរចាដែលខ្លួនកំពុងសម្របសម្រួល ដែលមានគោលបំណងឈានទៅរកការបញ្ចប់សង្គ្រាមរវាងសហរដ្ឋអាមេរិក និងអ៊ីរ៉ង់ផងដែរ៕​

The post លោក ត្រាំ បញ្ជាក់ថាអ៊ីស្រាអែល និងលីបង់ យល់ព្រមលើបទឈប់បាញ់រយៈពេល ១០ថ្ងៃ appeared first on .