រដ្ឋមន្ត្រីក្រសួងហិរញ្ញវត្ថុលោក Ho Duc Phoc បាននិយាយថា ក្រុមហ៊ុនក្រៅស្រុកខ្នាតយក្សដូចជា Facebook និង Google បានបង់ពន្ធចូលរដ្ឋចំនួន ៥,១ ទ្រីលានដុង ឬ ២២០ លានដុល្លារ សម្រាប់រយ:ពេលចន្លោះពីឆ្នាំ ២០១៨ ដល់ ២០២១ ។ នេះបើយោងតាមការចុះផ្សាយពី VN Express ។
នៅក្នុងរបាយការណ៍មួយ ដែលបានកត់ត្រាក្នុងខែមេសា ឆ្នាំ ២០២១ លោក Phoc បានជូនដំណឹងដល់សមាជិកសភា ថា ក្រុមហ៊ុន Facebook បានបង់ពន្ធចំនួន ៨៤,៩ លានដុល្លារ ស្របពេលក្រុមហ៊ុន Google បានបង់ ៨១,៩ លានដុល្លារ និង Microsoft បានបង់ ២៨ លានដុល្លារ ។
មិនតែប៉ុណ្ណោះ នៅក្នុងរបាយការណ៍ដដែលនេះ បានបង្ហាញទៀតថា អាជ្ញាធរវៀតណាម ក៏បានប្រមូលប្រាក់ចំនួន ៧៣៥ ពាន់លានដុង ឬ ៣៦,៤ លានដុល្លារ ពីការដោះស្រាយការរំលោភបំពាន និងគេចវេសការបង់ពន្ធដោយបុគ្គល រួមទាំងអង្គភាពផ្តល់សេវាកម្មឌីជីថល និងពាណិជ្ជកម្មអេឡិចត្រូនិកក្រៅស្រុកផងដែរ ។
លើសពីនេះ កាលពីឆ្នាំមុន វៀតណាម អាចរកចំណូលបាន ៥១,៩ លានដុល្លារ ពីការយកពន្ធលើវេទិកាក្រៅស្រុក ដែលជាការកើនឡើង ១៥% ពីឆ្នាំ ២០២០ ។
ក្រៅពីនេះ ប្រទេសវៀតណាម ក៏កំពុងសម្លឹងមើលឱកាស ក្នុងការយកពន្ធលើអ្នកលក់អនឡាញផងដែរ ទាំងនៅលើវេទិកាពាណិជ្ជកម្មអេឡិចត្រូនិក និងប្រព័ន្ធផ្សព្វផ្សាយសង្គម ដោយសារតែការលក់តាមប្រព័ន្ធទាំងនេះ បានកើនឡើងទ្វេដង ក្នុងរយ:ពេលប៉ុន្មានឆ្នាំថ្មីៗនេះ ។
លោក Phoc ក៏បានអំពាវនាឱ្យមានការរឹតបន្តឹងបទប្បញ្ញតិ និងធ្វើឱ្យមានភាពប្រសើរឡើងនូវសមត្ថភាពក្នុងការប្រមូលពន្ធ ដើម្បីដោះស្រាយការគេចវេសពីការបង់ពន្ធ ឱ្យកាន់តែមានប្រសិទ្ធភាពជាងនេះ ៕
