លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ កាលពីរសៀលថ្ងៃទី២០ ខែឧសភា ឆ្នាំ២០២៥ បានរៀបចំជំនួបពិភាក្សាដាច់ដោយឡែកមួយជាមួយនឹងសមាជិកសកម្មរបស់សមាគមសិល្បករខ្មែរ ដើម្បីជជែកគ្នាដោយបើកចំហ ជុំវិញដំណើរវិវត្តន៍ការងាររយៈពេល១ឆ្នាំមកនេះ ដែលពួកគាត់បានចូលរួមយ៉ាងសកម្មគ្រប់សកម្មភាពដោយស្ម័គ្រចិត្តដើម្បីប្រយោជន៍រួមក្នុងវិស័យសិល្បៈវប្បធម៌។
បើតាមសមាគមសិល្បករខ្មែរ ក្នុងជំនួបនោះ លោកជំទាវអ្នកឧកញ៉ា ម៉ៅ ចំណាន គិតម៉េង បានមានប្រសាសន៍ថា៖ «រយៈពេលមួយឆ្នាំហើយ ដែលបងប្អូនសមាជិកសកម្មភាគច្រើនបានចូលរួមយ៉ាងសកម្មភាពជាមួយនឹងសមាគមសិល្បករខ្មែរ នៅក្នុងអាណត្តិទី៦ ដែលដឹកនាំដោយនាងខ្ញុំផ្ទាល់។ ថ្វីដ្បិតថា យើងមានសកម្មភាពច្រើន និងបានជួបគ្នាច្រើន ប៉ុន្តែខ្ញុំដឹងយ៉ាងច្បាស់ថា យើងមិនមានពេលបានជជែកគ្នា និងស្វែងយល់ពីគ្នាច្រើននោះទេ។ ដូច្នេះការជួបគ្នានៅថ្ងៃនេះអាចនិយាយបានថា ជាពេលវេលាដ៏ពិសេសមួយ ដែលយើងអាចមានពេលជជែកគ្នា ផ្តល់យោបល់កែតម្រូវគ្នាដោយផ្ទាល់ ឬក៏មានរឿងក្នុងចិត្តអ្វីចង់និយាយ អាចនិយាយដោយបើកចំហ»។
ជាលទ្ធផលនៅក្នុងកិច្ចប្រជុំនេះ សមាជិកសកម្មភាពភាគច្រើនចូលរួមផ្តល់មតិយោបល់ គំនិតកែលម្អ និងលើកឡើងពីទិសដៅដែលត្រូវធ្វើឱ្យចំគោលដៅនាពេលបច្ចុប្បន្ន និងពេលខាងមុខ។
ក្នុងនាមប្រធានសមាគមសិល្បករខ្មែរ អ្នកឧកញ៉ា ម៉ៅ ចំណាន គិតម៉េង បានបញ្ជាក់ថា លោកជំទាវនឹងខិតខំឱ្យខ្លាំងបន្ថែមលើគ្រឹះការងារដែលបានខិតខំកសាងមួយឆ្នាំមកនេះ ហើយព្យាយាមជំរុញសកម្មភាពសិល្បៈឱ្យកាន់តែច្រើនលើគ្រប់វិស័យ ទាំងវិស័យចម្រៀង ភាពយន្ត សម្តែង ដើរម៉ូដ និងពិសេសសិល្បៈបុរាណ។ ក្នុងនោះក៏ព្យាយាមស្វែងរកនូវអ្វីដែលជាផលប្រយោជន៍ឱ្យកាន់តែច្រើនបន្ថែមទៀតជូនដល់សិល្បករសិល្បការិនី ពិសេសរៀមច្បងដែលមានអាយុកាន់តែច្រើន។
ដោយឡែកបងប្អូនសិល្បករជាសមាជិកសកម្ម ក៏បានសម្តែងការសប្បាយចិត្ត និងប្តេជ្ញាចូលរួមគ្រប់សកម្មភាពរបស់សមាគមសិល្បករខ្មែរ ដោយពួកគាត់គិតថា ការជួយសមាគមសិល្បករខ្មែរ ជាការជួយលើកតម្កើងសិល្បៈវប្បធម៌ទាំងមូល និងជាការជួយដល់អាជីពសិល្បៈពួកគាត់ផ្ទាល់ផងដែរ៕
