អ្នកឧកញ៉ា សុខ គង់ ប្រធានក្រុមប្រឹក្សាភិបាល ក្រុមហ៊ុនសូគីម៉ិច អ៊ិនវេសមេន គ្រុប និងជាម្ចាស់សណ្ឋាគារសុខា បានប្រាប់ពីបច្ចេកទេសគ្រប់គ្រងអាជីវកម្ម ឱ្យបានជោគជ័យថា ប្រកបមុខរបរអ្វីក៏ដោយ ត្រូវតែចុះតាមដានឱ្យជាប់ ដើម្បីរៀនសូត្រផង និងធ្វើឱ្យដំណើរការទៅមុខផង។
ក្នុងវីដេអូអំពីជីវប្រវត្តិសង្ខេបរបស់អ្នកឧកញ៉ា ដែលបង្ហាញនៅលើទំព័រហ្វេសបុក សុខាអចលនទ្រព្យ កាលពីថ្ងៃទី០៧ ខែមិថុនា ឆ្នាំ២០២២នេះ អ្នកឧកញ៉ា សុខ គង់ បានបង្ហើបឱ្យដឹងថា លោកបានចាប់ផ្តើមរៀនរកស៊ី តាំងពីសម័យសង្គ្រាមឆ្នាំ១៩៧៣ ដោយពេលនោះលក់អង្ក សាំង ប្រេង អំបិល និងដូរជ្រូកជាដើម មុនត្រូវជាប់ពន្ធនានៅវៀតណាមជាង ៧ខែ។ លុះដល់ឆ្នាំ១៩៧៩ លោកក៏បានវិលត្រឡប់មកទីក្រុងភ្នំពេញ ដែលដំបូងឡើយរកស៊ីបន្តិចបន្តួចនៅលើទូក តែមិនសមប្រកប។ បន្ទាប់មកទៀត លោកក៏បានឡើងមករកស៊ីលើដីគោកវិញ ដោយកិនកៅស៊ូ ធ្វើសំបកកង់ឡាន លក់ទៅវៀតណាម និងមានដើមទុន ត្រឹមតែ មាស១ជី។ ក្រោយមកទាហានក៏កម្ម៉ង់ឱ្យធ្វើស្បែកជើងកង់ឡាន ឱ្យកងទ័ពចំនួន ៥ម៉ឺនគូ ដែលពេលនោះហើយលោកទទួលបានមាសដល់ ១០០ជី ដើម្បីធ្វើជាដើមទុនវិនិយោគលើមុខជំនួញផ្សេងៗទៀត។
អ្នកឧកញ៉ា បញ្ជាក់ថាអ្វីដែលស្រឡាញ់ និងចង់ធ្វើ គឺលោកតែងតែធ្វើដោយខ្លួនឯងផ្ទាល់ផងដែរ ដែលពេលខ្លះម៉ោង៣ទាបភ្លឺក៏លោកងើបធ្វើ។ លោកបន្ថែមថា៖ “ការងារណាដែលខ្ញុំធ្វើហើយ ខ្ញុំមិនអាចបោះបង់បាននោះទេ ខ្ញុំត្រូវតែប្រឹងធ្វើ…។ អ្វីៗដែលយើងធ្វើការ មានន័យថាយើងត្រូវតែតស៊ូ ខិតខំពីវា”។
សូមទស្សនាវីដេអូលម្អិតបន្ថែមខាងក្រោម៖
