ក្រុមហ៊ុន PH Property ត្រូវបានគេស្គាល់ជា បុរី ប៉េង ហួត ដែលជាក្រុមហ៊ុនអភិវឌ្ឍអចលនទ្រព្យឈានមុខគេមួយនៅកម្ពុជា ជាមួយនឹងបទពិសោធជាង ១៥ឆ្នាំ ក្នុងការកសាងគម្រាងលំនៅឋានដែលមានគុណភាពខ្ពស់ លំដាប់លើមធ្យម។
ភាពជោគជ័យយ៉ាងសម្បើមធំមហិមាររបស់ បុរី ប៉េងហួត គឺមិនអាចមើលរំលងបានឡើយ សហគ្រិនមាឌតូចចិត្តធំមានឥទ្ធិពលក្នុងពិភពជំនួញនៅប្រទេសកម្ពុជា ពាណិជ្ជករ ថៃ ជាហួត ជាវិនិយោគិនដ៏សកម្ម និងចំណានក្នុងវិស័យអចលនទ្រព្យ។ លោកមានស្រុកកំណើតកើតជានៅឃុំព្រែករំដេង ស្រុកស្រីសន្ធរ ខេត្តកំពង់ចាម។
លោកត្រូវបានព្រះករុណា ព្រះបាទសម្តេចព្រះបរមនាថ នរោត្តម សីហមុនី ត្រាស់បង្គាប់ផ្តល់គោរមងារ«ឧកញ៉ា» កាលពីថ្ងៃទី៩ ខែឧសភា ឆ្នាំ២០០៨ តាមរយៈព្រះរាជក្រឹត្យលេខ នស/រកត/០៥០៨/៥០២ ។
ឧកញ៉ា ថៃ ជាហួត ប្រធានក្រុមប្រឹក្សាភិបាល ក្រុមហ៊ុន ប៉េងហួត គ្រុប ដែលជាអ្នកជំនួញដែលមានចិត្តមុតស្រូច គិតល្អិតល្អន់ស៊ីជម្រៅមើលអំពីចក្ខុវិស័យវែងឆ្ងាយក្នុងការអភិឌ្ឍធុរកិច្ច។ លោកត្រូវបានអ្នកជំនួញក្នុងវិស័យច្រើនមានការកោតសរសើរអំពីគុណវុឌ្ឍ និងមហិច្ឆតារបស់លោក ដែលហ៊ានបោះទុនវិនិយោគរាប់ពាន់លានដុល្លារអាមេរិក ទៅលើការអភិវឌ្ឍបុរីលំនៅឋាន ប៉េង ហួត រាប់សិបគម្រោង រាប់ម៉ឺនខ្នងផ្ទះនៅរាជធានីភ្នំពេញ។
ក្រៅពីមុខជំនួញអចលនទ្រព្យដ៏លេចធ្លោនៅប្រទេសកម្ពុជា ឧកញ៉ា ថៃ ជាហួត ក៏កំពុងវិនិយោគក្នុងវិស័យចំណីអាហារ និងភេសជ្ជៈផងដែរ៕
