ក្រុមការងារពិធីការមកពី ៤ ក្រសួង ស្ថាប័នរបស់រដ្ឋ នឹងរួមគ្នាត្រៀមទទួលបដិសណ្ឋារកិច្ចភ្ញៀវកិត្តិយស ដែលរួមមានថ្នាក់ដឹកនាំកំពូលៗ អ្នកឧកញ៉ា ឧកញ៉ា និងអ្នកមុខអ្នកការជាច្រើនរូប នៅក្នុងពិធីរៀបអាពាហ៍ពិពាហ៍របស់ចៅស្រី លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី០៤-០៥ ខែធ្នូ ឆ្នាំ២០២២ ខាងមុខនេះ។ នេះបើតាមនាយិការពិធីការឧបនាយករដ្ឋមន្ត្រី ជា សុផារ៉ា បានថ្លែងឱ្យដឹង នៅព្រឹកថ្ងៃពុធ ទី៣០ ខែវិច្ឆិកានេះ។
ចៅស្រី លោក ជា សុផារ៉ា មានឈ្មោះថា “អ៊ាង និធិជ្ជនី ដឺណេ” ត្រូវជាកូនស្រីរបស់លោក អ៊ាង សុផល្លែត និងលោកជំទាវ ជា សុផាកន្នី នឹងត្រូវចូលរោងជ័យរៀបមង្គលការដ៏ធំជាមួយនឹងកូនកំលោះឈ្មោះថា “ប៉ែន សំអាត សុទ្ធចិត្ត” ដែលជាកូនប្រុសរបស់លោកជំទាវ ហាក់ ស្រីទូច និងលោកបណ្ឌិត ប៉ែន សំអាត ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រី និងជាអនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ហើយលោកក៏ធ្លាប់កាន់តួនាទីជាអគ្គនាយករងគយ និងរដ្ឋាករកម្ពុជា។
បើតាមលោកស្រី គីម ពៅ នាយិការពិធីការឧបនាយករដ្ឋមន្ត្រី ជា សុផារ៉ា បានថ្លែងឱ្យដឹងក្នុងកិច្ចប្រជុំការងារពិធីការ ត្រៀមមង្គលការខាងលើ នៅព្រឹកថ្ងៃទី៣០ ខែវិច្ឆិកា ឆ្នាំ២០២២នេះ ថា ពិធីរៀបអាពាហ៍ពិពាហ៍នេះ នឹងមានក្រុមការងារពិធីការ មកពី៤ក្រសួងរួមគ្នា ដើម្បីទទួលភ្ញៀវកិត្តិយស ក្នុងនោះរួមមាន ក្រុមការងារក្រសួងរៀបចំដែនដី ចំនួនប្រមាណ ៧០នាក់ និងក្រសួងអភិវឌ្ឍន៍ជនបទ ក្រសួងបរិស្ថាន និងក្រុមការងារក្រសួងសេដ្ឋកិច្ច និងហិរញ្ញវត្ថុ សរុបរាប់រយនាក់បន្ថែមទៀត។
លោកស្រី គីម ពៅ បានបញ្ជាក់ឱ្យដឹងបន្ថែមថា សម្រាប់កម្មវិធីនៅល្ងាចថ្ងៃទី០៤ និងព្រឹកថ្ងៃទី០៥ ខែធ្នូ នឹងត្រូវធ្វើនៅភូមិគ្រឹះរបស់លោកឧបនាយករដ្ឋមន្ត្រី ជា សុផារ៉ា និងកម្មវិធីទទួលទានអាហារនៅល្ងាចថ្ងៃទី០៥ នឹងធ្វើឡើងនៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ។ ចំណែកឯក្រុមការងារពិធីការទាំងអស់ តម្រូវឱ្យពាក់អាវហូលសម្រាប់បុរស និងពាក់អាវប៉ាក់សម្រាប់នារី នៅក្នុងកម្មវិធីពេញទាំងពីរថ្ងៃតែម្តង។
សូមជម្រាបជូនផងដែរថា ពិធីរៀបអាពាហ៍ពិពាហ៍របស់កូនកំលោះ-កូនក្រមុំខាងលើ ក៏នឹងមានតែងលំអរផ្កាស្បៃរឿងចំនួន ១លានទង ដែលដាំដោយផ្ទាល់ដៃផងដែរ។ លោក អ៊ាង សុផល្លែត ឪពុករបស់កូនក្រមុំ បានជ្រើសយកការដាំផ្កាស្បៃរឿងប្រមាណ ១លានទង ដោយផ្ទាល់ដៃនេះ គឺដើម្បីបង្ហាញពីក្តីស្រឡាញ់ដ៏ធំធេងចំពោះកូនស្រី និងចង់បង្ហាញដែរថា ផ្កាប្រើប្រាស់សម្រាប់តាំងលំអរក្នុងពិធីមង្គលការ ឬពិធីផ្សេងៗ គឺយើងអាចដាំបានដោយខ្លួនឯង ដោយពុំចាំបាច់យកពីបរទេស ជាពិសេសគឺអាចជួយផ្តល់ការងារដល់ប្រជាជនកម្ពុជាបានទៀតផង៕
