អ្នកឧកញ៉ា ម៉ុង ឫទ្ធី

អ្នកឧកញ៉ា ម៉ុង ឫទ្ធី ទទួលអ្នកវិនិយោគិនអាមេរិក ស្វែងរកទីតាំងសាងសង់តំបន់សេដ្ឋកិច្ចពិសេសពហុបំណង នៅខេត្តព្រះសីហនុ

ឧកញ៉ាដែនដី — Thu, 23 Apr 2026 08:09:00 +0000

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប នៅថ្ងៃទី២២ ខែមេសា ឆ្នាំ២០២៦ បានអញ្ជើញទទួលដំណើរទស្សនកិច្ចរបស់អ្នកវិនិយោគិនសហរដ្ឋអាមេរិក ចុះពិនិត្យមើលទីតាំងតំបន់អភិវឌ្ឍន៍កសិកម្ម កសិឧស្សាហកម្ម របស់ក្រុមហ៊ុន ម៉ុង ឫទ្ធី គ្រុប នៅស្រុកព្រៃនប់ និងស្រុកស្ទឹងហាវ ខេត្តព្រះសីហនុ ដើម្បីស្វែងរកទីតាំងដែលសមស្របអាចសាងសង់ជាតំបន់សេដ្ឋកិច្ចពិសេសពហុបំណង។

តាមរយៈបណ្តាញសង្គមហ្វេសប៊ុក អ្នកឧកញ៉ា បានលើកឡើងថា ថ្ងៃពុធ ទី២២ ខែមេសា ដើម្បីទាក់ទាញអ្នកវិនិយោគទុនបរទេសឱ្យមកបណ្តាក់ទុននៅក្នុងព្រះរាជាណាចក្រកម្ពុជា លោកបានដឹកនាំក្រុមការងាររួមជាមួយលោក MICAH LEWIS partner VP Aquisitions មកពីសហរដ្ឋអាមេរិក ដើម្បីចុះមកពិនិត្យមើលទីតាំងដោយផ្ទាល់ នៅក្នុងតំបន់អភិវឌ្ឍន៍កសិកម្ម កសិឧស្សាហកម្ម របស់ក្រុមហ៊ុន ម៉ុង ឫទ្ធី គ្រុប ស្រុកព្រៃនប់ និងស្រុកស្ទឹងហាវ ខេត្តព្រះសីហនុ ដើម្បីស្វែងរកទីតាំងដែលសមស្របអាចសាងសង់ជាតំបន់សេដ្ឋកិច្ចពិសេស ពហុបំណងបានប្រកបដោយសក្តានុពល។

សូមជម្រាបថា អ្នកឧកញ៉ា ម៉ុង ឫទ្ធី ត្រូវបានគេស្គាល់ថា ជាអ្នកជំនួញជើងចាស់មួយរូបនៅកម្ពុជា លើវិស័យកសិឧស្សាហកម្ម រួមទាំងម្ចាស់ក្រុមហ៊ុនដាំដូងប្រេង រាប់ម៉ឺនហិកតា និងជាម្ចាស់តំបន់កសិទេសចរណ៍ ម៉ុង ឫទ្ធី សែនជ័យ ជាកន្លែងទេសចរណ៍បង្កើតឡើងថ្មី មានផ្ទៃដីសរុបប្រមាណ ៥០០ហិកតា នៅខេត្តកំពង់ស្ពឺ។ អ្នកឧកញ៉ា បានវិនិយោគនៅភូមិសាស្ត្រខេត្តព្រះសីហនុ អស់រយៈពេលជាង ៣០ឆ្នាំមកហើយ ហើយកាលថ្ងៃទី៨ ខែមេសា ឆ្នាំ២០២៦ ថ្មីៗនេះ អ្នកឧកញ៉ាក៏ទើបរៀបចំពិធីសម្ពោធអគារការិយាល័យថ្មីមួយខ្នង នៅលើតំបន់ឆ្នេរសមុទ្រកែវផុស ឃុំកែវផុស ស្រុកស្ទឹងហាវ ផងដែរ៕

The post អ្នកឧកញ៉ា ម៉ុង ឫទ្ធី ទទួលអ្នកវិនិយោគិនអាមេរិក ស្វែងរកទីតាំងសាងសង់តំបន់សេដ្ឋកិច្ចពិសេសពហុបំណង នៅខេត្តព្រះសីហនុ appeared first on .

អ្នកឧកញ៉ា ម៉ុង ឫទ្ធី បានធ្វើរឿងមួយ បន្ទាប់ពីប្តីប្រពន្ធពីរនាក់ដែលមានជីវភាពខ្វះខាតមកសុំការងារធ្វើ

ឧកញ៉ាដែនដី — Tue, 21 Apr 2026 01:50:14 +0000

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានជួយផ្តល់ការងារ ផ្តល់ជម្រក និងដើមទុនមួយចំនួនទៀត ដល់ប្តីប្រពន្ធពីរនាក់មានជីវភាពខ្វះខាត ដែលបានទៅជួបអ្នកឧកញ៉ា ដើម្បីសុំការងារធ្វើ។

អ្នកឧកញ៉ាអគ្គនាយក បានឱ្យដឹងលើបណ្តាញសង្គមហ្វេសប៊ុក នៅថ្ងៃទី២០ ខែមេសា ឆ្នាំ២០២៦ ថានៅថ្ងៃចន្ទនេះ លោកបានជួបជាមួយប្តីប្រពន្ធពីរនាក់ មកពីភូមិដើមពោធិ៍ ឃុំរមេញ ស្រុកកោះអណ្តែត ខេត្តតាកែវ ដោយប្តីឈ្មោះ សន់ គោ បួសបានជាង១០វស្សា ទើបតែចាកសិក្ខាបទ ឯប្រពន្ធឈ្មោះ ទួន ម៉ាលីស មានកូនម្នាក់។

«ដោយសារតែជីវភាពគ្រួសារខ្វះខាតខ្លាំងពេកបានមកសុំការងារធ្វើ ខ្ញុំបានឱ្យមកចាំដីភូមិចាស់របស់ខ្ញុំនៅភូមិថ្មី ឃុំរវៀង ស្រុកសំរោង ខេត្តតាកែវ ដោយឱ្យប្រាក់ខែទាំងពីរនាក់ប្តីប្រពន្ធ និងឱ្យដាំដំណាំបន្លែបង្ការ ឈើហូបផ្លែលក់យកលុយចុះ ហើយខ្ញុំបានទិញកង់អាគុយថ្មីឱ្យមួយគ្រឿងថែមទៀតផង។ មានផ្ទះថ្មនៅស្រាប់ ដីធំទូលាយ ទឹក ភ្លើងអគ្គិសនីគ្រប់គ្រាន់ បើជួយប៉ុណ្ណឹងហើយរកលុយមិនបានទៀតចប់ហើយ នៅតែមិនក្លាយជាសេដ្ឋីប្រាក់លានរៀលទៀតចប់ហើយ»។ អ្នកឧកញ៉ា បានបន្ថែម។

សូមជម្រាបថា អ្នកឧកញ៉ា ម៉ុង ឫទ្ធី សមាជិកព្រឹទ្ធសភា គឺជាសេដ្ឋីមួយរូបនៅកម្ពុជាលើវិស័យកសិឧស្សាហកម្ម។ ជារឿយៗអ្នកឧកញ៉ាតែងជួយដល់ប្រជាពលរដ្ឋដែលមានជីវភាពខ្វះខាត និងកំពុងជួបការលំបាក។ ជាក់ស្តែងថ្មីៗនេះ អ្នកឧកញ៉ាបាននាំយកកុមារា និងកុមារី សរុបចំនួន ៤៩នាក់ ស្ថិតនៅភូមិព្រៃចាន់ ខេត្តបន្ទាយមានជ័យ ដែលផ្ទះសម្បែងរបស់ពួកគេរងផលប៉ះពាល់ពីការឈ្លានពានរបស់យោធាថៃ ដើម្បីយកមកចិញ្ចឹមបីបាច់ថែរក្សា នៅក្នុងតំបន់រមណីយដ្ឋានអភិវឌ្ឍន៍កសិទេសចរណ៍ ម៉ុង ឫទ្ធី សែនជ័យ ខេត្តកំពង់ស្ពឺ ផងដែរ៕

The post អ្នកឧកញ៉ា ម៉ុង ឫទ្ធី បានធ្វើរឿងមួយ បន្ទាប់ពីប្តីប្រពន្ធពីរនាក់ដែលមានជីវភាពខ្វះខាតមកសុំការងារធ្វើ appeared first on .

អ្នកឧកញ៉ា ម៉ុង ឫទ្ធី បើកសម្ពោធអគារការិយាល័យថ្មី នៅស្រុកស្ទឹងហាវ និងជូនរង្វាន់បុគ្គលិកម្នាក់ ១សន្លឹក ដើម្បីអបអរឱកាសបុណ្យចូលឆ្នាំថ្មី

ឧកញ៉ាដែនដី — Wed, 08 Apr 2026 08:59:43 +0000

អ្នកឧកញ៉ា ម៉ុង ឫទ្ធី នាព្រឹកថ្ងៃទី៨ ខែមេសា ឆ្នាំ២០២៦នេះ បានរៀបចំពិធីសម្ពោធអគារការិយាល័យថ្មីមួយខ្នង នៅលើតំបន់ឆ្នេរសមុទ្រកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ ព្រមទាំងបានជូនរង្វាន់ដល់ថ្នាក់ដឹកនាំ និងបុគ្គលិកក្រុមហ៊ុនម្នាក់ចំនួន ១សន្លឹក (១០០ដុល្លារ) ដើម្បីអបអរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានមកដល់នៅថ្ងៃទី១៤ ខែមេសា ខាងមុខនេះ។

តាមរយៈបណ្តាញសង្គមហ្វេសប៊ុក អ្នកឧកញ៉ា បានលើកឡើងថា ក្រោយពីបានធ្វើដំណើរឆ្លងកាត់ព្យុះភ្លៀងផ្គររន្ទះ អស់រយៈពេល ៣១ឆ្នាំ នៅលើតំបន់ឆ្នេរសមុទ្រកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ នៅដើមឆ្នាំ២០២៥ លោកបានសម្រេចចិត្តសាងសង់អគារការិយាល័យថ្មីមួយខ្នង កំពស់៣ជាន់ ស្មើនឹង ១,៤៣១ម៉ែត្រការ៉េនៅលើផ្ទៃដីទំហំ ១២,៣៥០ម៉ែត្រការ៉េ។ ថ្ងៃនេះ អ្នកឧកញ៉ានិងក្រុមការងារបានសាងសង់រួចរាល់ជាស្ថាពរ ព្រមទាំងបានរៀបដាក់ឱ្យដំណើរការជាផ្លូវការ នាពេលនេះ។

អ្នកឧកញ៉ាអគ្គនាយក បានបន្ថែមថា វេលាម៉ោង៨ព្រឹក ក្រុមហ៊ុនបានបើកកម្មវិធីប្រជុំរួម ដែលរួមមានក្រុមហ៊ុនបុត្រសម្ព័នដូចជា ក្រុមហ៊ុនចំការកៅស៊ូ អឹមអធី រ៉ាប់ប៊ើរ ផ្លេនថេសិន ក្រុមហ៊ុនចិញ្ចឹមសត្វ អឹមភិក រោងចក្រផលិតចំណីសត្វ ដើម្បីផ្លាស់ប្ដូរយោបល់ រិះរកគ្រប់មធ្យោបាយ ឆ្លងកាត់ការលំបាកដែលមិនធ្លាប់បានជួបប្រទះទាល់តែសោះ គឺសង្រ្គាមមជ្ឈឹមបូព៌ាដែលនាំឱ្យមានការខ្វះខាតថាមពលយ៉ាងធ្ងន់ធ្ងរជាសាកល។

អ្នកឧកញ៉ា ម៉ុង ឫទ្ធី បានឱ្យដឹងទៀតថា ក្រោយកិច្ចប្រជុំ ដើម្បីជាការលើកទឹកចិត្តដល់បុគ្គលិក និងថ្នាក់ដឹកនាំ រួមជាមួយនឹងពិធីបុណ្យចូលឆ្នាំថ្មីប្រពៃណីជាតិខ្មែរយើង នឹងចូលមកដល់ថ្ងៃអង្គារ១២រោច ខែចេត្រ ឆ្នាំម្សាញ់ ត្រូវនឹងថ្ងៃពុធ ទី១៤ ខែមេសា ឆ្នាំ២០២៦ខាងមុខនេះ លោកបានចែកជូនរង្វាន់លើកទឹកចិត្តមួយសន្លឹកម្នាក់គ្រប់ៗគ្នាផងដែរ៕

The post អ្នកឧកញ៉ា ម៉ុង ឫទ្ធី បើកសម្ពោធអគារការិយាល័យថ្មី នៅស្រុកស្ទឹងហាវ និងជូនរង្វាន់បុគ្គលិកម្នាក់ ១សន្លឹក ដើម្បីអបអរឱកាសបុណ្យចូលឆ្នាំថ្មី appeared first on .

អ្នកឧកញ៉ា ម៉ុង ឫទ្ធី បានធ្វើរឿងមួយ ក្រោយឃើញស្ត្រីម្ចាស់ចំការម្នាក់ ធ្វើចំការមិនមានដីផ្ទាល់ខ្លួន នៅសង្កាត់កោះដាច់

ឧកញ៉ាដែនដី — Thu, 19 Mar 2026 08:15:47 +0000

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប នៅថ្ងៃទី១៩ ខែមីនានេះ បានជួបស្ត្រីម្ចាស់ចំការម្នាក់ ស្ថិតនៅសង្កាត់កោះដាច់ ខណ្ឌជ្រោយចង្វារ រាជធានីភ្នំពេញ ដែលធ្វើចំការដោយមិនមានដីផ្ទាល់ខ្លួន ហើយលោកនឹងឱ្យក្រុមការងារជួយដោះស្រាយបញ្ហាលំបាកមួយចំនួនដូចជា ជួយជី និងជួយរកទីផ្សារជូន។

នៅលើបណ្តាញសង្គម អ្នកឧកញ៉ាអគ្គនាយក បានលើកឡើងបែបនេះថា៖ “ព្រឹកថ្ងៃព្រហស្បតិ៍ទី១៩ ខែមីនា ឆ្នាំ២០២៦ ធ្វើដំណើរឆ្លងកាត់តាមផ្លូវបេតុង ភូមិចុងកោះ សង្កាត់កោះដាច់ ខណ្ឌជ្រោយចង្វារ រាជធានីភ្នំពេញ ក្រឡេកឃើញចំការខ្ញី និងចំការត្រាវដ៏ធំល្វឹងល្វើយ ហើយក៏បានឈប់ជួបលោកស្រី សួន ជាម្ចាស់ចំការគាត់មិនមានដីផ្ទាល់ខ្លួនទេ ចំការទាំងអស់នេះសុទ្ធតែជួលដីគេទេ។ ខ្ញុំសូមកោតសរសើរនិងវាយតម្លៃខ្ពស់បំផុត ចំពោះការព្យាយាមខិតខំប្រឹងប្រែងរបស់គ្រួសារគាត់ ខ្ញុំកំពុងតែអោយក្រុមការងារទំនាក់ទំនងជាមួយគាត់ ដើម្បីរកឱកាសជួយសម្រួលដោះស្រាយ ការលំបាកមួយចំនួនដូចជា ជី និងទីផ្សារ។ល”។

សូមជម្រាបថា អ្នកឧកញ៉ា ម៉ុង ឫទ្ធី ត្រូវបានគេស្គាល់ថា ជាអ្នកជំនួញជើងចាស់មួយរូបនៅកម្ពុជា លើវិស័យកសិឧស្សាហកម្ម រួមទាំងម្ចាស់ក្រុមហ៊ុនដាំដូងប្រេង រាប់ម៉ឺនហិកតា។ អ្នកឧកញ៉ា ក៏ជាម្ចាស់តំបន់កសិទេសចរណ៍ ម៉ុង ឫទ្ធី សែនជ័យ ជាកន្លែងទេសចរណ៍បង្កើតឡើងថ្មី មានផ្ទៃដីសរុបប្រមាណ ៥០០ហិកតា នៅខេត្តកំពង់ស្ពឺ ហើយបច្ចុប្បន្នលោកក៏មានតួនាទីជាសមាជិកព្រឹទ្ធសភាផងដែរ៕

The post អ្នកឧកញ៉ា ម៉ុង ឫទ្ធី បានធ្វើរឿងមួយ ក្រោយឃើញស្ត្រីម្ចាស់ចំការម្នាក់ ធ្វើចំការមិនមានដីផ្ទាល់ខ្លួន នៅសង្កាត់កោះដាច់ appeared first on .

អ្នកឧកញ៉ា ម៉ុង ឫទ្ធី ដឹកនាំគណៈកម្មការទី៣ ព្រឹទ្ធសភា ចុះជួបពិភាក្សាការងារជាមួយថ្នាក់ដឹកនាំនិងមន្ត្រីរាជការខេត្តកំពត

ឧកញ៉ាដែនដី — Mon, 09 Mar 2026 05:35:43 +0000

នាព្រឹកថ្ងៃទី៩ ខែមីនា ឆ្នាំ២០២៦នេះ អ្នកឧកញ៉ា ម៉ុង ឫទ្ធី ប្រធានគណៈកម្មការទី៣ នៃព្រឹទ្ធសភា (គណៈកម្មការ ផែនការ វិនិយោគ កសិកម្ម ធនធានទឹក ឧតុនិយម អភិវឌ្ឍន៍ជនបទ និងបរិស្ថាន) បានដឹកនាំសមាជិក សមាជិកា ចូលជួបពិភាក្សាការងារជាមួយថ្នាក់ដឹកនាំ និងមន្ត្រីរាជការ នៃខេត្តកំពត។

កិច្ចជំនួបពិភាក្សានេះ មានការអញ្ជើញចូលរួមពីសំណាក់ថ្នាក់ដឹកនាំខេត្ត ក្រុង ស្រុក ឃុំ សង្កាត់ និងមន្ទីរជំនាញពាក់ព័ន្ធជុំវិញខេត្ត ក្នុងគោលបំណងសិក្សាស្វែងយល់ និងប្រមូលព័ត៌មានសំខាន់ៗដែលពាក់ព័ន្ធនឹងវិស័យក្នុងសមត្ថកិច្ចរបស់គណៈកម្មការ។ តាមរយៈជំនួបនេះ ក៏ដើម្បីតាមដានរាល់វឌ្ឍនភាពការងារ និងបញ្ហាប្រឈមនានានៅក្នុងមូលដ្ឋាន សំដៅជំរុញកិច្ចសហប្រតិបត្តិការរវាងរដ្ឋបាលថ្នាក់ក្រោមជាតិ ឱ្យកាន់តែមានប្រសិទ្ធភាព ដើម្បីបម្រើផលប្រយោជន៍ជូនប្រជាពលរដ្ឋក្នុងខេត្តកំពត ឱ្យបានកាន់តែប្រសើរឡើង។

សូមជម្រាបថា មុនបញ្ចប់កម្មវិធី អ្នកឧកញ៉ា ម៉ុង ឫទ្ធី ប្រធានគណៈកម្មការទី៣ នៃព្រឹទ្ធសភា ក៏បានជូនសាច់ក្រកចម្រុះរស់ជាតិ ចំនួន១០កេស ស្មើនឹង១០០គីឡូក្រាម និងវត្ថុអនុស្សាវរីយ៍ជូន ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពតផងដែរ៕

The post អ្នកឧកញ៉ា ម៉ុង ឫទ្ធី ដឹកនាំគណៈកម្មការទី៣ ព្រឹទ្ធសភា ចុះជួបពិភាក្សាការងារជាមួយថ្នាក់ដឹកនាំនិងមន្ត្រីរាជការខេត្តកំពត appeared first on .

អ្នកឧកញ៉ា ម៉ុង ឫទ្ធី ត្រូវការផ្ទៃដី ៣ម៉ឺនហិកតា សម្រាប់ដាំដូងប្រេង និងបង្កើតរោងចក្រផលិតប្រេងឆានៅកម្ពុជា

ឧកញ៉ាដែនដី — Mon, 23 Feb 2026 07:31:59 +0000

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី បានបង្ហើបឱ្យដឹងថា ក្រុមហ៊ុនរបស់លោកត្រូវការដីសរុបប្រមាណ ៣០,០០០ហិកតា (៣ម៉ឺនហិកតា) សម្រាប់ដាំដូងប្រេង និងបង្កើតរោងចក្រផលិតប្រេងឆា នៅប្រទេសកម្ពុជា ខណៈដែលបច្ចុប្បន្នក្រុមហ៊ុនរបស់លោកមានដីដាំដូងប្រេងត្រឹម ១៦,០០០ហិកតាប៉ុណ្ណោះ។

ការថ្លែងរបស់អ្នកឧកញ៉ា ម៉ុង ឫទ្ធី បានធ្វើឡើងនៅថ្ងៃទី២១ ខែកុម្ភៈ ឆ្នាំ២០២៦ នៅក្នុងដំណើរទស្សនកិច្ចរបស់គណៈប្រតិភូក្លឹបអ្នកកាសែតកម្ពុជា នៅក្រុមហ៊ុន អិម ភីក អេស៊ីអិមស៊ី ក្រុមហ៊ុន វិនិយោគទុនដំណាំដូងប្រេង និងតំបន់អភិវឌ្ឍន៍ ឧកញ៉ា ម៉ុង (កែវផុស) ដែលស្ថិតនៅខេត្ដព្រះសីហនុ។

អ្នកឧកញ៉ាអគ្គនាយក បានគូសបញ្ជាក់បែបនេះថា៖ “ដើម្បីបង្កើតរោងចក្រផលិតប្រេងឆាមួយ យើងមានគោលដៅច្បាស់លាស់ណាស់។ មុននឹងដាំដូបប្រេងនេះ យើងបានសរសេរនៅក្នុងផែនការអាជីវកម្មថា ចាប់តាំងពីពេលដាំ រហូតដល់ការបង្កើតជារោងចក្រប្រេងឆានៅពេលណា ប៉ុន្តែវាមិនបានទៅតាមគោលបំណង។ យើងត្រូវការដីចំនួន ៣០,០០០ហិកតា ដើម្បីដាំដូងប្រេងឱ្យចេញជាប្រេងឆៅ យកមកផលិតជាប្រេងឆា។ បើមិនបានដី ៣០,០០០ហិកតាទេ នោះយើងនឹងត្រូវនាំចូលប្រេងឆៅបន្ថែមពីបរទេស ដើម្បីមកផលិតប្រេងឆា។ ដូច្នេះយើងមិនមានសង្ឃឹមថា មានដីដាំដូងប្រេងឱ្យបានដល់ ៣០,០០០ហិកតានោះទេ។ សព្វថ្ងៃនេះ យើងទើបតែបាន ១៦,០០០ហិកតាប៉ុណ្ណោះ ហើយចំនួននេះយើងដាំគ្មានសល់ដីនោះទេ គឺដាំទាល់តែអស់ដីតែម្តង។ នរណានិយាយថា មានផ្ទៃដីទំនេរច្រើន ខ្ញុំក៏មិនដឹងដែរ ប៉ុន្តែសម្រាប់ក្រុមហ៊ុនខ្ញុំ មិនមានដីដាំឱ្យគ្រប់ ៣០,០០០ហិកតានោះទេ”។

អ្នកឧកញ៉ា ម៉ុង ឫទ្ធី បានបញ្ជាក់ឱ្យបានដឹងផងដែរថា សម្រាប់ផ្ទៃដីដែលអាចដាំដូងប្រេងបាន មាននៅបណ្តាខេត្តជាប់សមុទ្រមួយចំនួនដូចជា ខេត្តកែប កំពត ព្រះសីហនុ និងខេត្តកោះកុង ព្រោះដូងប្រេងត្រូវការទឹកភ្លៀងលើសពី ២,០០០មីលីម៉ែត្រ បានវាឱ្យផលអាចទទួលយកបាន។ ចំពោះនៅខេត្តរតនគិរី និងមណ្ឌលគិរី ដែលមានកម្រិតទឹកភ្លៀងត្រឹម ១,០០០មីលីម៉ែត្រ ទៅ ១,២០០មីលីម៉ែត្រ មិនអំណោយផលក្នុងការដាំដូងប្រេងនោះទេ៕

The post អ្នកឧកញ៉ា ម៉ុង ឫទ្ធី ត្រូវការផ្ទៃដី ៣ម៉ឺនហិកតា សម្រាប់ដាំដូងប្រេង និងបង្កើតរោងចក្រផលិតប្រេងឆានៅកម្ពុជា appeared first on .

អ្នកឧកញ៉ា ម៉ុង ឫទ្ធី ធ្វើពិធីខួបកំណើតជូនលោកជំទាវ នៅថ្ងៃ១៤កុម្ភៈ ព្រមទាំងអនុញ្ញាតឱ្យកុមារភៀសសឹក ចូលរួមកម្មវិធី

ឧកញ៉ាដែនដី — Mon, 16 Feb 2026 01:29:48 +0000

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប កាលថ្ងៃទី១៤ ខែកុម្ភៈ ឆ្នាំ២០២៦ បានរៀបចំពិធីខួបកំណើតភរិយា លោកជំទាវ ម៉ែន ស៊ុន ម៉ុង ឫទ្ធី (លោកជំទាវប្រហុក) ភ្ជាប់ជាមួយថ្ងៃបុណ្យនៃសេចក្តីស្រឡាញ់ ដោយមានការចូលរួមពីញាតិមិត្ត កូនចៅ ភ្ញៀវជាតិ អន្តរជាតិ ព្រមទាំងអនុញ្ញាតឱ្យកុមារភៀសសឹក មកពីភូមិព្រៃចាន់ ខេត្តបន្ទាយមានជ័យ បានចូលរួមកម្មវិធីផងដែរ។

នៅលើបណ្តាញសង្គម អ្នកឧកញ៉ា ម៉ុង ឫទ្ធី បានលើកឡើងថា៖ “ថ្ងៃសៅរ៍ ទី១៤ ខែកុម្ភៈ ឆ្នាំ២០២៦ ភ្ជាប់ជាមួយនឹងថ្ងៃបុណ្យនៃសេចក្តីស្រលាញ់ (Valentine’s Day) ខ្ញុំបានធ្វើពិធីខួបកំណើតជូនលោកជំទាវប្រហុកផងដែរ រូបខ្ញុំព្រមទាំងភរិយា កូនចៅទាំងអស់ សូមអរគុណដល់ភ្ញៀវជាតិ អន្តរជាតិ ទាំងអស់ដែលបានផ្តល់កិត្តិយសអញ្ជើញមកចូលរួម”។

អ្នកឧកញ៉ា បានបន្តថា នារាត្រីដ៏មនោរម្យនេះ ក៏មានកុមារា កុមារី ភៀសសឹកមកពីភូមិព្រៃចាន់ ខេត្តបន្ទាយមានជ័យ បាននាំគ្នាមកចូលរួមផងដែរ ពួកគាត់អត់មានវត្ថុអនុស្សាវរីយ៍អីដូចគេទេ មានតែក្រដាស់មួយសន្លឹកម្នាក់កាត់ជារូបបេះដូង រួចហើយសរសេរជូនពរលោកយាយ លោកតា ព្រមទាំងអរគុណដែលលោកយាយ លោកតាបានផ្តល់កន្លែងស្នាក់នៅ និងអាហារហូបតាំងពីថ្ងៃអង្គារ៍ ទី២៣ ខែធ្នូ ឆ្នាំ២០២៥ រហូតមកដល់ពេលបច្ចុប្បន្ននេះ ហើយនឹងអាចបន្តទៅមុខទៀតមិនដឹងជាដល់ថ្ងៃណាទេ។

សូមជម្រាបថា អ្នកឧកញ៉ា ម៉ុង ឫទ្ធី បាននាំយកកុមារា និងកុមារី សរុបចំនួន ៤៩នាក់ ស្ថិតនៅភូមិព្រៃចាន់ ខេត្តបន្ទាយមានជ័យ ដែលផ្ទះសម្បែងរបស់ពួកគេរងផលប៉ះពាល់ពីការឈ្លានពានរបស់យោធាថៃ ដើម្បីយកមកចិញ្ចឹមបីបាច់ថែរក្សា នៅក្នុងតំបន់រមណីយដ្ឋានអភិវឌ្ឍន៍កសិទេសចរណ៍ ម៉ុង ឫទ្ធី សែនជ័យ ខេត្តកំពង់ស្ពឺ៕

The post អ្នកឧកញ៉ា ម៉ុង ឫទ្ធី ធ្វើពិធីខួបកំណើតជូនលោកជំទាវ នៅថ្ងៃ១៤កុម្ភៈ ព្រមទាំងអនុញ្ញាតឱ្យកុមារភៀសសឹក ចូលរួមកម្មវិធី appeared first on .

អ្នកឧកញ៉ា ម៉ុង ឫទ្ធី ដឹកនាំអាជ្ញាធរមូលដ្ឋានខេត្តព្រះសីហនុ ចុះទស្សនកិច្ចរោងចក្រផលិតចំណីសត្វ ដែលមានកម្លាំងផលិត ៥០តោនក្នុងមួយម៉ោង

ឧកញ៉ាដែនដី — Wed, 11 Feb 2026 08:02:25 +0000

អ្នកឧកញ៉ា ម៉ុង ឫទ្ធី សមាជិកព្រឹទ្ធសភា និងជាអគ្គនាយកក្រុមហ៊ុន ម៉ុង ឫទ្ធី គ្រុប នៅព្រឹកថ្ងៃទី១១ ខែកុម្ភៈ ឆ្នាំ២០២៦នេះ បានអញ្ជើញដឹកនាំសមាជិក សមាជិកាក្រុមសមាជិកព្រឹទ្ធសភាប្រចាំភូមិភាគទី៧ ចុះជួបសំណេះសំណាលជាមួយក្រុមប្រឹក្សាឃុំ សង្កាត់ ស្មៀនឃុំ សង្កាត់ និងនាយប៉ុស្តិ៍នគរបាលរដ្ឋបាលឃុំ សង្កាត់ ក្នុងខេត្តព្រះសីហនុ នៅសាលប្រជុំការិយាល័យរោងចក្រផលិតចំណីសត្វ M’s PIG ស្ថិតក្នុងភូមិមនោរម្យ ឃុំតានៃ ស្រុកព្រៃនប់ ខេត្តព្រះសីហនុ។

ពិធីសំណេះសំណាលនេះ មានការអញ្ជើញចូលរួមពី គណៈកម្មការទី១ព្រឹទ្ធសភា, គណៈកម្មការទី៣ព្រឹទ្ធសភា, ក្រុមសមាជិកព្រឹទ្ធសភាប្រចាំភូមិភាគទី៧, ថ្នាក់ដឹកនាំខេត្ត ក្រុង ស្រុក, ក្រុមប្រឹក្សាឃុំ សង្កាត់, ស្មៀនឃុំ សង្កាត់, នាយប៉ុស្តិ៍នគរបាលរដ្ឋបាលឃុំ សង្កាត់ និងមន្ត្រីអគ្គលេខាធិការដ្ឋានព្រឹទ្ធសភា សរុបចំនួន ១៥០នាក់។

អ្នកឧកញ៉ា ម៉ុង ឫទ្ធី បានគូសបញ្ជាក់នៅលើទំព័រហ្វេសប៊ុកថា មុននឹងចាប់ផ្តើមកម្មវិធី លោកបានដឹកនាំសមាជិក សមាជិកានៃអង្គពិធីអញ្ជើញពិនិត្យសកម្មភាពក្រុមការងារគ្រឿងចក្រកំពុងស្ថាបនាផ្លូវក្រាលកៅស៊ូមួយខ្សែ តភ្ជាប់ពីផ្លូវជាតិលេខ៤ ទៅផ្លូវអន្លង់ក្រពើមានប្រវែង ១,៩៧១ម៉ែត្រ ទទឹង ៦.៤ម៉ែត្រ និងចុះទស្សនកិច្ចខ្សែសង្វាក់ផលិតកម្មរោងចក្រផលិតចំណីសត្វ ដែលមានកម្លាំងផលិត ៥០តោនក្នុងមួយម៉ោងផងដែរ។

សូមជម្រាបថា អ្នកឧកញ៉ា ម៉ុង ឫទ្ធី ធ្លាប់បានឱ្យដឹងថា រោងចក្រផលិតចំណីសត្វរបស់ក្រុមហ៊ុន អិម ភីក អេស៊ីអិមស៊ី ខេមបូឌា (M’s PIG ACMC Cambodia) ជាបុត្រសម្ព័ន្ធរបស់ក្រុមហ៊ុន ម៉ុង ឫទ្ធី គ្រុប ដែលមានកម្លាំងផលិតជាមធ្យមជាង ៣០,០០០តោនក្នុងមួយខែ។ សម្រាប់ថ្ងៃអនាគត អ្នកឧកញ៉ា ក៏មានផែនការបង្កើនសមត្ថភាពរោងចក្រនេះ ឱ្យខ្លាំងជាងមុន ដើម្បីអាចផ្គត់ផ្គង់លើទីផ្សារកម្ពុជាទាំងមូលបាន៕

The post អ្នកឧកញ៉ា ម៉ុង ឫទ្ធី ដឹកនាំអាជ្ញាធរមូលដ្ឋានខេត្តព្រះសីហនុ ចុះទស្សនកិច្ចរោងចក្រផលិតចំណីសត្វ ដែលមានកម្លាំងផលិត ៥០តោនក្នុងមួយម៉ោង appeared first on .

ផ្ទុះការចាប់អារម្មណ៍! អ្នកឧកញ៉ា ម៉ុង ឫទ្ធី រំឭកអនុស្សាវរីយ៍ប្រវត្តិកសាងផ្លូវ «ម៉ុង ឬទ្ធី» នៅរាជធានីភ្នំពេញ

ឧកញ៉ាដែនដី — Fri, 06 Feb 2026 02:51:56 +0000

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុងឫទ្ធី គ្រុប នៅថ្ងៃទី០៥ ខែកុម្ភៈ ឆ្នាំ២០២៦ បានរំឭកអនុស្សាវរីយ៍ប្រវត្តិកសាងផ្លូវ «ម៉ុង ឬទ្ធី» នៅរាជធានីភ្នំពេញ កាលឆ្នាំ២០០៨ ដែលធ្វើឱ្យផ្ទុះការចាប់អារម្មណ៍យ៉ាងខ្លាំងនៅលើបណ្តាញសង្គម។

តាមរយៈទំព័រហ្វេសប៊ុក អ្នកឧកញ៉ា ម៉ុង ឫទ្ធី បានលើកឡើងថា៖ “ថ្ងៃនេះខ្ញុំសរសេរប្រវត្តិ វិថីបណ្ឌិត ម៉ុង ឬទ្ធី ដែលមានទីតាំងស្ថិតនៅក្នុង រាជធានីភ្នំពេញ ដើម្បីអោយប្រិយមិត្តយើងដែលបានធ្វើដំណើរឆ្លងកាត់ និងប្រកបអាជីវកម្មអាស្រ័យផលតាមបណ្តោយផ្លូវនេះ ព្រមទាំងកូនចៅជំនាន់ក្រោយៗបានដឹងផងដែរ”។

អ្នកឧកញ៉ា បន្តថានៅក្នុងឆ្នាំ១៩៩៨ ខ្មែរក្រហមបានយល់ព្រមធ្វើសមាហរណកម្ម ជាមួយរាជរដ្ឋាភិបាលកម្ពុជា ដើម្បីបិតបញ្ចប់សង្គ្រាមបង្ហូរឈាមកាប់សម្លាប់ខ្មែរគ្នាឯង ១៩៧០-១៩៩៨ រយៈពេល២៨ឆ្នាំនៃសង្គ្រាម។ នៅពេលស្រុកមានសង្គ្រាមមិនបានកសាងអភិវឌ្ឍន៍អ្វីនោះទេ គឺយើងជាប់ដៃតែការពារជាតិជាចម្បង។ ដោយសង្កេតឃើញជាក់ស្តែងពីមហន្ដរាយនៃសង្គ្រាម ធ្វើឱ្យហេដ្ឋារចនាសម្ព័ន្ធផ្លូវ ស្ពាន សាលារៀន មន្ទីរពេទ្យ វត្តអារាម លំនៅឋានត្រូវបានខូចខាតស្ទើរតែទាំងអស់។

«ខ្ញុំបានចូលរួមចំណែកកសាងអភិវឌ្ឍន៍ឡើងវិញជាច្រើន ជាមួយរាជរដ្ឋាភិបាលកម្ពុជា។ និយាយដោយឡែកខ្ញុំបានចាប់ផ្តើមជួយសាងសង់ វិថីបណ្ឌិត ម៉ុង ឬទ្ធី ក្នុងឆ្នាំ២០០៨ ហើយរួចរាល់បើកឱ្យដំណើរការប្រើប្រាស់ក្នុងឆ្នាំ២០០៩ ដូចមានភ្ជាប់មកជាមួយនូវរូបថតចាស់ៗនេះស្រាប់។ ខ្ញុំសរសេរនេះគ្មានគោលបំណងរំលើកយកគុណស្រ័យអីទេ បើមានបងប្អូនកូនក្មួយណាដឹងគុណក៏បាន បើរមើលគុណក៏មិនអីទេ»។ អ្នកឧកញ៉ា បានគូសបញ្ជាក់បន្ថែម។

ក្រោយការបង្ហោះសាររបស់អ្នកឧកញ៉ាខាងលើនេះ បានធ្វើឱ្យអ្នកលេងបណ្តាញសង្គមជាច្រើនចាប់អារម្មណ៍ និងបញ្ចេញមតិជាការដឹងគុណ។ ក្នុងនោះដែរ គណនីហ្វេសប៊ុកមួយលើកឡើងថា «សូមគោរពអរគុណ និងដឹងគុណលោកពូ ដែលបានជួយក៏សាងផ្លូវមួយខ្សែនេះ កាលនោះផ្លូវពិបាកធ្វើដំណើរណាស់»។ គណនីមួយទៀត ក៏បានលើកឡើងផងដែរថា «ខ្ញុំជិះធ្វើការរាល់ថ្ងៃ សូមអរគុណលោកពូ ខ្ញុំហៅតែផ្លូវម៉ុងឫទ្ធី»។

សូមជម្រាបថា វិថីឧកញ៉ា ម៉ុង ឬទ្ធី ជាវិថីមួយខ្សែចាប់ផ្តើមពីរង្វង់មូលកាំកូស៊ីធី ឆ្លងកាត់មហាមិត្តភាពកម្ពុជា-វៀតណាម (ផ្លូវហាណូយ) កាត់ផ្សារបឹងបៃតង ហើយទៅភ្ជាប់ត្រឹមវិថីឧកញ៉ា ទ្រី ហេង។ បច្ចុប្បន្ននេះ វិថីមួយខ្សែនេះ ត្រូវបានអាជ្ញាធរសង់ផ្លូវបេតុងបន្តទម្លុះមករហូតដល់បុរីពិភពថ្មីសែនសុខ៕

The post ផ្ទុះការចាប់អារម្មណ៍! អ្នកឧកញ៉ា ម៉ុង ឫទ្ធី រំឭកអនុស្សាវរីយ៍ប្រវត្តិកសាងផ្លូវ «ម៉ុង ឬទ្ធី» នៅរាជធានីភ្នំពេញ appeared first on .

អ្នកឧកញ៉ា ម៉ុង ឫទ្ធី បង្ហាញរូបថតកាលនៅជានាយទាហាន តាំងពីជាង ៣០ឆ្នាំមុន

ឧកញ៉ាដែនដី — Thu, 05 Feb 2026 00:30:00 +0000

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុងឫទ្ធី គ្រុប នៅព្រលឹមថ្ងៃទី០៣ ខែកុម្ភៈ ឆ្នាំ២០២៦ បានបង្ហាញរូបថតអនុស្សាវរីយ៍កាលនៅជានាយទាហាន ក្នុងអង្គភាពនាយកដ្ឋានភូមិសាស្ត្រ នៃក្រសួងការពារជាតិ តាំងពី ៣១ឆ្នាំមុន និងលិខិតឧទ្ទេសនាមរបស់ថ្នាក់ដឹកនាំ ដើម្បីចុះបំពេញបេសកកម្មការងារ។

អ្នកឧកញ៉ា បានឱ្យដឹងលើបណ្តាញសង្គមបែបនេះថា៖ “យប់នេះគេងមិនលក់ភ្ញាក់ពីដំណេកតាំងពីម៉ោង៣ទៀបភ្លឺ បើកទូរស័ព្ទមើលរូបថតចាស់ៗដែលបានបន្សល់ទុកពីមុនមក បានប្រទះឃើញរូបថត វរសេនីយ៍ត្រី ម៉ុង ឫទ្ធី ព្រមទាំងលិខិតឧទ្ទេសនាម លេខ ០11/ឧន 95 ចុះថ្ងៃទី១១ ខែមករា ឆ្នាំ១៩៩៥ ដែលមានចុះហត្ថលេខាដោយ លោកឧត្តមសេនីយ៍ទោ អ៊ុន ដែន ជាមេបញ្ជាការ អង្គភាព នាយកដ្ឋានភូមិសាស្ត្រ។ បើគិតមកដល់ពេលនេះមានរយៈពេល ៣១ឆ្នាំ បានកន្លងផុតទៅហើយ”។

«កាលណោះប្រទេសយើងនៅមិនទាន់បានបិទបញ្ចប់សង្គ្រាមនៅឡើយទេ រហូតមកដល់ឆ្នាំ១៩៩៨ ទើបខ្មែរក្រហមយល់ព្រមធ្វើសមាហរណកម្មបញ្ចប់សង្គ្រាម ខ្ញុំបានចូលបម្រើក្នុងជួរកងទ័ពអស់រយៈពេល ១១ឆ្នាំ ទើបបានពាក់ស័ក្តិ៤នេះ”។ អ្នកឧកញ៉ា បានបន្ត។

អ្នកឧកញ៉ា ម៉ុង ឫទ្ធី បានគូសបញ្ជាក់ថា រូបថតនេះលោកចង់ឱ្យក្មេងៗជំនាន់ក្រោយបានឃើញថា ឪពុកម្ដាយជីដូនជីតា កាលពីជំនាន់មុន មិនមានទូរស័ព្ទដៃឬសម្ភារៈទំនើបៗដូចបច្ចុប្បន្ននេះទេ ពេលធ្វើដំណើរទៅណាមកណាម្តងៗ សុទ្ធតែត្រូវប្រើលិខិតឧទ្ទេសនាមស្ទើរតែទាំងអស់។

សូមជម្រាបថា អ្នកឧកញ៉ា ម៉ុង ឫទ្ធី ត្រូវបានគេស្គាល់ថា ជាអ្នកជំនួញជើងចាស់មួយរូបនៅកម្ពុជា លើវិស័យកសិឧស្សាហកម្ម រួមទាំងម្ចាស់ក្រុមហ៊ុនដាំដូងប្រេង រាប់ម៉ឺនហិកតា។ អ្នកឧកញ៉ា ក៏ជាម្ចាស់តំបន់កសិទេសចរណ៍ ម៉ុង ឫទ្ធី សែនជ័យ ជាកន្លែងទេសចរណ៍បង្កើតឡើងថ្មី មានផ្ទៃដីសរុបប្រមាណ ៥០០ហិកតា នៅខេត្តកំពង់ស្ពឺ ព្រមទាំងបច្ចុប្បន្នមានតួនាទីជាសមាជិកព្រឹទ្ធសភាផងដែរ៕

The post អ្នកឧកញ៉ា ម៉ុង ឫទ្ធី បង្ហាញរូបថតកាលនៅជានាយទាហាន តាំងពីជាង ៣០ឆ្នាំមុន appeared first on .